Spokespersen blong COVID-19 i talem se man we i bin ronwe long kwarentin long wiken bae hemi pem araon VT 600,000 from hemi brekem rul blong COVID-19.
Russel Tamata i talem se COVID-19 task fos i tekem serious long aksen blong man ia.
Hemi talem se amaon ia, task fos blong COVID-19 i disaed long hem blong man ia, hemi mas pem kwarentin kost blong olgeta six pipol we oli bin gat clos kontak wetem hem.
“ Ol six pipol ia oli bin kat klos kontak wetem hem, long taem we hemi aot long kwarentin blong ko wajem even blong Fes Napuan,” Mr Tamata i talem.
“ Ol six pipol ia oli stap vinis long kwarentin, mo man ia i hemi mas mitim ol kost ia folem risk we hemi mekem.
“ Ol six pipol ia bae oli stap insaed long kwarentin blong 14 dei.”
Mr Tamata i talem se task fos bae hemi lukluk long risk asesmen ripot blong helt mo National Disaster Management Office, mo bae oli jajem man ia folem COVID-19 protocol.
“ Long wik ia, oli bin testem olgeta mo result i kamaot negativ,” hemi talem.
“Task fos blong COVID-19 i talem se man ia hemi no sowem eni risk blong COVID-19 from hemi bin tes negetiv bifo i kam long Vanuatu.”
National Task fos i talem se hemia hemi fes inciden blong lukim wan repatriate i aot long kwarentin olsem.
” Kavman i stap pem samples VT 100,000 olsem kost blong wan repatriate nomo blong spendem 14 dei insaed long kwarentin,” Mr Tamata i talem.
Man ia we i aot long kwarentin, hemi bin folem repatriation flaet blong Auckland long New Zealand long last wik mo hemi bin kam long Taiwan.
