Follem straek blong ol tija long wik ia, i luikim plante skul long Penama Provins i closem doa blong olgeta tedei moning.

Long aelan blong Ambae, wan Class 6 studen blong Ambaebulu Elma Toka i talem wanem we i happen long skul tedei moning.

“Mi ko long skul long moning, ale tija i kivim tu tes long mifala, mifala mekem flatem, mo hem i sendem mifala kam bak from olgeta sta ko long straek, hemi se bai mifala kam bak stap long haus.”

Wari blong ol studen mo peren emia from plante long ol skuls long aelan blong Ambae i no completem yet en blong tem 2 exam or tes blong olgeta yet.

Emi toktok weh kamaot long wan year 12 studen blong St. Patricks College Ross Tari taem emi talemaot konsen blong hem.

“Mi olsem wan yia 12 studen mi kat konsen from straek blong ol tijas, sapose emi stap longtaem bai emi save affektem mifala ol examinesen klas.”

Wan konsen papa Rendol Tari i talem se tugeta tija mo studen i kam viktim blong situesen ia.

“Mi ting se hemia emi wan gudfala tingting blong yumi mitim konsen blong ol tijas ia, olsem yufala ol risponsibol pipol long kavman, ating hem wan gudfala tingting blong yufala i lukluk long nid blong olgeta from tru long olgeta tu yufala tu i save ko antap long ples ia.

“Mo nekis konsen blong mi nao i ko long ol pikinini blong mifala weh naoia mifala luk oli stap ko long haus, mifala stap wari bai oli save skul gud or no, from taem straek olsem ia, mifala no save duresen blong strark ia bai hemi stap hao long, mifala stap fraet se bai oli stap longtaem tumas, bai intres blong skul bai i nomo gat long olgeta.“

“Afta hemia emi wan bigfala efek weh bai i save affectem olgeta or sapsoe no bai oli stap longtaem tumas sam bai oli save involve long sam samting weh bai emi no stret bai i save kosem sam problem long hom or long komuniti weh emia emi wan bigfala effect tu long edukesen blong olgeta.”

Silia Pakoro wan konsen mama long eria blong Lolowai, emi talem se perens oli mas lukaotem gud mo tijim gud ol pikinin taem oli wet blong kavman i lukluk long issue ia.

“Tedei mi stap taem weh mi luk ol pikinini oli kam kam bak, mi sori long ol, from hemi no kam long en blong term tu blong oli complitim ol tes mo yumi ol perens yumi stap  redi blong harem resal blong ol.

Oslem wan mama weh mi stap nomo long haus mo lukaot long ol pikinini, mi sori lo ol. I ko bak long ol perens, mi wantem talem long yufala ol mama weh yufala stap bisi bisi everidei se naoia yumi mas stap yumi kat ol oun taem blong yumi lukaot long ol pikinini, yu mas putem wan taem blong yu toktok long ol kasem wanem taem, mi no save wataem bai straek ia i vinis be yumi mas lukaot gud long ol pikinini.”

Apil blong ol perens i ko long kavman blong oli mas lukluk gud long isu ia mo sortem aot blong ol studen i save ko bak long skul.

“Mo mi askem long kavman, sapose weh yu stap,  yu stap long wanem Ministri be yufala mas putem han tugeta blong  yufala i considerem ol reque blong ol tija weh oli wantem.

Yufala mas mekem from yumi everiwan nao yumi depen, edukesen hemi ki wei blong Vanuatu mo yumi yumi  depen nao long ol tija  blong yumi ia, mi wantem se bai yufala mas lukluk long ol, blo yufala agri long wanem weh oli mekem.”