COVID-19 Advisory Committee i talem se seken flaet blong repatriation i nosave hapen tumoro from i nokat gudfala arenjmen blong ol flaet yet.
Spokespersen blong COVID-19, Len Tarivonda, i talem se flaet ia, National Airline blong Vanuatu, Air Vanuatu i sud mekem mo se,” Wan bigfala namba blong ol pipol bae i stap kam long ol kaontri we i kat kes blong COVID-19 i hae long hem mo Vanuatu i mas pripea.”
Hemi talem se Vanuatu i stap long hae risk taem ol pipol ia i stap kambak.
“Situasen blong Australia naioa, long state blong Victoria, Canberra mo New South Wales i kat ol hae kes blong Covid-19 mo i kat fulap restriksen mo lok daon i stap yet,” Mr Tarivonda.
“Mo hemia nao, mifala long Health i mas save gud wea ples nao ol pipol ia i stap kambak long hem.”
Paul Pio, Manager Marketing mo Communication ofisa blong Air Vanuatu, i talem se oli stap wet long disisen blong ol COVID-19 Advisory Committee nomo.
Hemi talem se only resen Air Vanuatu i dileyem flaet, from oli nid blong komply wetem regulasen blong Vanuatu anda long National Disaster Management Office.
“Bae Air Vanuatu i kamaot bakeken wetem niufala schedule blong repatriation flaet,” Mr Pio i talem.
Department blong Foreign Affairs, i talem se flaet we New Zealand airline i shud mekem i kam long Vanuatu tumoro hemi kaonsel tu.
Director blong Foreign Affairs, Yvon Basil, i talem se flaet ia i shud flaem famili blong leit High Commissioner blong Vanuatu long New Zealand, Johnson Naviti mo ol seasonal wokman.
“Yumi kat wan opsen wetem Kavman blong New Zealand from wan flaet mo tinktink blong flaet ia, hemi blong karem famili blong leit Mr Naviti mo tu tekem sam wokman blong Recognised Seasonal Employer i kambak,” Mr Basil i talem.
“Mbe sins Air Vanuatu i bin kamaot wetem schedule blong hem, Air New Zealand i disaed blong stopem defens flaet ia mo sapotem Air Vanuatu long flaet blong hem.”
Director Basil i talem se Ofis blong Foreign Affairs i talem se plante Ni-Vanuatu wetem ol residen i stap regista vinis long ol Office blong Vanuatu High Commission long ol nara kaontri.
Hemi askem ol pipol we oli stap kambak long Vanuatu blong kontinu blong regista.
“ Ova long 4000 pipol i stap redi blong kam long seken flaet blong repatriation ia,” Mr Basil i talem.
