Ol pipol long 11 komuniti long aelan blong Malo bae oli save gat wan impruv diet afta long damej blong Saeklon Harold long ol karen blong olgeta.
Wan tim blong Save the Children long Santo i bin ko long aelan blong Malo mo distributum ol cuttings mo seeds ia.
Lenny Fred, Acting Programme Coordinator blong Save the Children, i talem se hem ia i blong impruvum livelihood blong ol pipol long east Malo.
“Main pepes blong mifala i distributum ol cuttings ia hem i blong impruvum livelihood mo impruvum diet blong ol pipol insaed long east Malo area council blong karem bak ol kakae we Saeklon Harold hem i bin damejem blong impruvum bak diet blong olgeta i kambak nomol bakeken,”Ms Fred i talem.
Ol communities ia i risivim ol cuttings blong manioc, kumala, aelan cabbage, taro mo ol seeds blong planem.
Ms Fred i talem se Save the Children i gat tri komponen blong rikavari blong Saeklon Harold. Feswan hem i blong impruvum wota insaed long sam komuniti long East Malo. So hem i tekem tri komuniti we Save the Children hem i bin impruvum wota insaed long komuniti blong olgeta. Seken samting hem i blong impruvum livelihood blong ol komuniti blong east Malo we hem i abaot 2000 plus population we oli live insaed. Namba tri hem i blong COVID-19.
Christion Lolo, wan Pastor long Samaranta Community, i talem se sapot blong ol cuttings ia, bae i help blong sapotem kakae long hom.
“Mi bin karem ol cutting ia long Save the Children long Santo wetem fanis we oli kivim. Mo mi bin planem ol cutting ia. Fanis bae hem i helpem mi from long ples we mifala i stap long hem, pig hem i damej tumas.”
Chief blong Tanmial Community long East Malo, Virop Vurobaravu, i talem se community blong hem i hapi tumas blong kasem ol seeds mo cuttings ia.
“Ol cuttings we bae oli karem i kam bae i helpem mifala bigwan long taem we mifala i stap long hem naoia. From saeklon Harold hem i bin damejem everi ting blong mifala,” Mr Vurobaravu i talem.
Malon Rasu, Area Secretary blong East Malo, i talem se Save the Children i bin kivimaot tu ol barb wire long ol komuniti ia blong oli fensem ol karen blong olgeta from ol wild pig oli stap kosem tu bigfala damej long ol karen kakae blong ol pipol long east Malo.
Ol 11 communities ia long east Malo, i gat Nalivuhaivanua, Alowaru, Tabunveresake, Atariboe, Afnarara, Aliaboe, Genesis, Ambahura, Navioro, Tanmial mo Amapelao.
