Ripot hemi soem se afta long Tropikol Saeklon Lola i kat ol pipol long Pentecost we oli kat damej long aos mo oli stap silip iet wetem ol famili blong olgeta kasem tete.
Hemi 2 manis nao we Tropikol Saeklon Lola hemi bin pas antap long noten pat blong kantri mo kasem tedei, sam pipol long ol aelan ia we oli kasem bigfala damej oli nogat aos iet mo olgeta stap silip wetem ol famili blong olgeta.
Aelan blong Pentecost hemi wan long ol aelan we kategori 5 saeklon ia hemi bin damajem bigwan mo i kat 50% long ol pipol long Sentrol Pentecost 1 mo 2, mo Saot Pentecost i lusem haus blong olgeta.
Mr Ham Asal, long Saot Pentecost, hemi talem se sam long ol pipol i stap liv iet wetem ol famili mo samfala oli stap long ol evacuasen setna klosap long eria blong olgeta.
“Ol pipol oli stap fesem had taem iet, long saot yumi luikim, especially long saot east Pentecost sam long ol famili oli stap wetem ol relatif iet long ol evacuasen setna,” hemi talem.
Pipol long aelan ia oli stap rikava slo slo long ol damej we disasta ia hemi livim behaen.
“Oli fesem had taem lelebet from jes afta long tropikol saeklon Pam ale tufala nara saeklon Judy wetem Kevin i bin afektem bigwan long eria ia vinis, ale Lola i kam bakagen.”
Long wan ripot we Vanuatu Red Cross Society hemi bin mekem, hemi konfem se fulap famili oli bildem bak ol aos blong olgeta finis wetem ol tapolen we olgeta stap distributem.
Ripot i talem tu se i kat wan hae nid blong sapotem ol famili we oli fesem bigfala impak blong bildim bak fulap ol strong haus we i sef mo strong long taem blong disasta.
VBTC hemi traem blong kasem NDMO be hemi no posibol.
Be Mr Asal hemi talem se ol pipol oli no mas depen tumas long kavman blong buildem bak komuniti mo living blong olgeta.
“Komuniti blong mifala long Maltakarantua emia long saot Pentecost, ol komuniti lida oli kam tugeta blong oli kamap wetem tingting blong oli save letem ol pipol blong oli wok tugeta blong oli save managem olgeta, blong oli save plannem ol kakae, mo ol krop we saeklon i no save spoilem.
“From long saeklon Lola yumi bin experience vinis we might ating hemi wan manis we kavman hemi no bin mekem efot blong mekem wei blong hemi blong kam in hariap, mekem se ol komuniti lida oli luk hemia, mekem oli kamap wetem tingting ia blong bai ol pipol oli mas wok tugeta, blong oli planem kakae we saeklon hemi no save spoilem.
“From long futa taem wan saeklon i strikem ples, be yumi olsem komuniti itself i save help aot bifo kavman i kam in.”
