Supreme Court long Port Vila bae hem i setemap wan nara deit bakeken blong harem ditel blong ol jajes we i stap long Bribery mo Korapsen kes akensem foma Prime Minister, mo tri narafala Member mo foma Member blong Palamen.
Foma Prime Minister mo wan MP blong Pentecost Constituency naoia, Charlot Salwai, foma Minister blong Agriculture mo wan MP blong Luganville Constituency naoia, Matai Seremiah, wan foma MP blong Malekula, Jerome Ludvaune mo foma MP blong Tafea Outer Islands, Tomker Netvunei oli stand trial for plea yestete mo talem se oli plead not guilty.
From risen ia, Supreme Court i talem se wan pre-trial konfrens bae i tekem ples long 10 Septemba blong setemap deit, blong harem ditel blong 11 jajes we i stap akensem olgeta.
Justice Viran Molisa Trief we i harem kes ia i talem se bae kot hem i apointem wan difren judge blong harem kes ia bakeken from hemi bin stap wok kolosap wetem tufala pati includum Mr Salwai taem hem i bin stap olsem Prime Minister.
Olgeta pati insaed long kes ia i talem se hemi no stret blong Justice Trief i harem kes ia.
Olgeta jaj we Public Prosecutor i putum akensem olgeta defendant ia hem i ko akensem Penal Code mo Lidasip Code folem ol event we i bin hapen long 22 mo 23 November blong 2016.
Mr Salwai hem i stap fesem tu count blong korapsen mo bribery blong ol ofisel we i ko akensem Seksen 73 (2) blong Penal Code [CAP 135], wan ofens we i tekem ten yia long kalapus.
Hem i stap fesem too, tu count blong bribery akensem Seksen 23 blong Lidasip Code Act 1998 mo tu moa count blong conflik blong intres akensem Seksen 24 blong act ia mo wan count blong perjury akensem seksen 17 blong Penal Code.
I gat alekesen se, Salwai hem i bin bribem wan foma Malekula MP Ludvaune blong ofarem hem wan portfolio olsem Health Minister blong convinsem hem blong witroem signature blong hem long wan mosen blong no-konfidens vot akensem Mr Salwai olsem Prime Minister long taem ia.
I gat acusation tu se, Mr Salwai hem i bin bribem foma MP, Mr Netvunei blong ofarem mo apointem hem afta, i ko long posisen blong Parliamentary Secretary long Ministry blong Agriculture wetem tingting blong influencem Mr Netvunei blong no sakem vot blong hem long no-konfidens vot akensem Mr Salwai.
I gat alekesen se tufala Mr Netvunei mo Mr Ludvaune oli akseptem ol apointmen ofa ia.
Ol jaj akensem Mr Seremaiah hem i from hem i fasilitatem proses blong karemaot signature blong Mr Netvunei mo Mr Ludvaune long mosen blong no-konfidens ia akensem foma Prime Minister Salwai.
Prosecution Ofis i klem se muv ia hemi olsem wan bribe blong defeatim mosen we foma Opposition i putum akensem foma Prime Minista Salwai.
