Sale blong alcohol bae i go hed nomo long selebresen blong 40 yia Independence long Vanuatu.
Minister blong Internal Affairs, Alatoi Ishmael Kalsakau, i talem se, “Yia ia Vanuatu bae i selebretem se hemi kat 40 yia, mo mi tink se kaontri i oldfala enaf blong luk save wanem we hemi stap mekem mo hem ia nao bae yumi no putum tabu long alcohol long yia ia.”
Hemi talem se naoia kaontri i majua finis blong save stanap hem wan olsem wan Independent kaontri.
“Hemi no luk gud taem yumi stap mekem ban blong alcohol long ol taem olsem ia mo long las yia Minister blong Internal Affairs, Andrew Napuat, blong las kavman hemi no bin putum banem alcohol long las Christmas mo yumi no luk plante pipol oli drong,” Minister Kalsakau i talem.
“Selebresen ia, bae ol police i strict moa long ol operation blong olketa bae I stat long tumoro I ko mo bae oli stat jekem ol streets mo bae oli mekem sua se ol pipol I behave long ol stret wei long pablik.” hem i talem.
“Bai i kat wan operation we Vanuatu Police Force bai i launchem blong i provaedem security long taem blong 40 yia selebresen anniversary long wik ia mo nekis wik.”
Minister Kalsakau i talem se oli stap lukluk tu blong karem aot ol ban long ol sale blong alcohol long wiken mo ol pablik holidei blong mekem se bae i open olwe nomo.
