Wetem ol damej we Tropikol Saeklon Lola i lego behaen, fulap skul long ol afekted eria raon long kantri oli stil klosem doa blong olgeta yet.

Hemia folem isu blong wota mo kakae mo nid blong shelta.

Igat olgeta skul long East Vanua Lava mo Mere Lava oli klos from shortej blong kakae mo wota.

Hemia I wanem we National Disaster Management Office i putem aot long letes situesen ripot blong hem.

Ripot hemi talem se 70% long ol klasrum i damej long Not Ambrym, mo oli nidim shelta hariap.

Sam skul long aelan blong Epi tu i damej bigwan long TC Lola mo lanslaed.

Long Pentecost tu i kat nid blong shelta hariap.

Mr Bazil Bule, Jeaman blong Eria Kaonsel long Sentrol Pentecost 2 (CP2), i talem se bai i tekem taem blong buildim bak ol skul.

“Ol skul blong yumi hemia we Lisasanamal wetem Enkul baebae i jas stap anda long administresen blong olgeta wetem Ministri blong Edukesen,” hemi talem.

“Be lukluk blong mi we i stap ba i tekem taem blong tufala skul ia i rekava bakeken from se saeklon hemi kilim olgeta gud, olsem se i damejem ol haus.

“Haus blong kinda kam kasem ol klas six studen hemia i damej everiwan. Staf haus tu oli karemaot tu – tri kapa blong ol haus.”

Principal blong Bwatnapni Skul, Mr Jim Basil Tabi, i talem se klosap everi klasrum mo staff haus oli damej.

“Long primeri skul, wan dabol klasrum i flae aot we ruf blong hem everiwan i aot.

“I kat damej long domitri blong ol boi, ful domitri ia long midel i terem ruf i ko tru long narasaed.

“Long wan staf haus bakeken, Mr. Amros i se hem tu i damej wan saed ruf i aot we hem i nomo save slip long hem.

“Long primeri skul yet wan narafala klasrum, ruf blong Varanda everi wan i flae, i kat wan klasrum nomo naoia i stan ap i stap.

“Blong yumi long primeri skul i had lelebet blong yumi stat.”

Wetem end blong yia exam we i stap kam kolosap, naoia Ministri blong Edukesen i lukluk moa mekem arenjmen blong ol afekted skul area ia.