Director blong Public Health i talem se jenis long bill blong Public Health bae i kivim pawa long Minister blong helt blong mekem public helt Emergency diklaresen long wan sik.
Len Tarivonda i talem se bill ia bae i helpem Ministry blong Health blong i gat moa pawa folem ol hae namba blong ol outbreak blong ol sik long wol.
Hemi talem se hemi impoten blong pawa we health minista bae i kat i mas stap insaed long akt ia from i neva kat bifo.
“ Diklarasen ia bae i alaoem blong helt i wok hem wan blong dil wetem eni sik o i save wok tugeta wetem State blong Emergency we i stap anda long National Disaster Management Office,” Mr Tarivonda i talem.
“ Pawa ia tu hemi flexibol, fo exampol, sapos yumi kat wan outbreak blong wan sik olsem measles, malaria o wan narafala disis bakeken, yumi save dikarem emergency ia long wan pat blong aelan, provins o wan pat blong kaontri we disis ia i stap afektem.
“ Risponsibliti ia bae hemi wan nara lukluk sapos State blong Emergency blong COVID-19 state bae hemi no kontinu, helt i save diklarem public helt imejensi anda long public helt act we bae hemi givim pawa blong mekem ol wok blong hem.”
Mr Tarivonda i talem se bae hemi festaem blong helt bae i kat pawa olsem blong mekem wan emergency diklarasen olsem.
Hemi talem se fulap kaontri olsem long pacific oli kat emergency diklaresen ia vinis.
“Folem jenis long Public Health Act, World Health Organisation i ripotem se everi yia i gat rikod blong niu disis i stap kamaot mo hemi rikodem 1100 epidemic raon long wol.
Bill blong Public Health (Amendment) Act No blong 2020 i wan long olketa Kavman bill blong pas long seken ordinary sitting blong Palamen long wik ia.