Private sector i nidim sapot from hemi engin blong economi blong Vanuatu.

Niu General Manager blong Vanuatu Chamber of Commerce mo Industry, Howard Aru i talemaot.

Mr Howard Aru we hemi statem wok olsem General Manager blong Vanuatu Chamber of Commerce mo Industry long eli April.

Hemi talem se bambae hemi mekem sua i kat developmen long private sector.

“I mas kat asistens long smol bisnis; mi biliv se i kat plante help mbe i no naf yet,” Mr Aru i talemaot.

“Yumi mas mekem sua se i kat help olsem finans tu blong sapotem growth blong bisnis sapos kaontri i luk private sector hemi impoten mbe yumi mas serious blong sapotem.”

Mr Aru i pointem aot tu isu blong Labour shotej long kaontri mo hemi se i mas gat wei blong solvem.

“Seasonal wok hemi kriatem wan nar aproblem long domestik labour; yumi statem seasonal wok blong 10 yia blong ol unskilled pipol mbe naoia ol man we oli kat save mo skil oli stap ko,” Mr Aru i talem.

Mr Aru i talem se isu blong Air Vanuatu i mekem bigfala impak long private sector.

“Plan A hemi blong rivivem bak airline mbe plan ia yumi stap wok lem blong ol pas yia mbe taem naoia hemi taem blong yumi lukluk long plan B o C; Yumi mas mekem wan samting from kanselation blong flaet hemi afektem bigwan tourism industry,” Mr Aru i talem.

Vanuatu Chamber blong Commerce i talem se private sector i mas wan konsen blong evriwan from hemi boostm economi blong wan kaontri.

Mr Aru i tekem posisen ia afta long Astrid Boulekone we hemi bin serve blong 12 yia mo vinis wok long February yia ia.

Bifo hemi tekem position ia hemi kat bigfala save long Private Sector mo strong rilasensip wetem Vanuatu Kavman.