Plante pikinini oli bin tekpat long Olympic Dei we hem i hapen long Satedei.
Acting Chief Executive Officer blong Vanuatu Association blong ol Sport (VASANOC), James Malau, i talem se association hem i glad tumas blong lukim bigfala involfmen blong olgeta pikinini, ol man, woman mo ol yangfala long selebresen blong dei ia long Satedei.
Mr Malau i talem se event ia emi hapen tru long Internatiional Olympic Committee mo sapot we emi kamaot long olgeta spot disapline long Port Vila mo tu olgeta physiotherapist long Vila Central Hospital we oli pat long Olympic Dei selebresen ia.
Mr Malau i talem se every yia long 23 June hemi dei we olgeta spot man,woman mo ol pikinini oli kam tugeta blong selebretem Olympic Dei mbe long Vanuatu bae selebresen i stap oltaem long wan Satedei sapos date ia i foldaon long wan nara dei.
Olympic Dei hem i wan dei blong promotem idea blong Olympic. Selebresen blong Olympic Dei i stat off long 23 June 1948. Olympic hem i wan liding intanasanal spoting event we i tekem tugeta olgeta spot pleia raon long wol we oli kam tugeta blong compit long plante difren spot.
Acting Chief Executive Officer ia i talem se wetem olgeta olympic valiu ia, i soem goal blong Olympic Muvmen we hemi blong kontribuit blong bildim wan pisful mo beta wol blong olgeta yangfala tru long spot.
Long dei ia olgeta pikinini oli bin pat long olgeta quize, fun run mo tu zumba.
Wan long olgeta spot woman mo semtaem ripresentatif blong Vanuatu Woman in Sports, Julia Kings i talem se wan long olgeta main valiu blong Olympic Dei selebresen ia hemi rispek.
Hem i talem tu se spots mbae hem i stil stanap strong long taem blong disasta.
Olgeta patisipens long dei ia oli bin kam tugeta lo Korman Cricket kraon mo selebreitem Olympic valiu blong spot .
