Vanuatu Paralympic athlete Elie Enock bai i save fokas moa nao long Tokyo Olympic games.

Ms Enock i gat naoia wan niu jea blong save sitaon long hem mo plei Javelin, Discus mo Hammer throw.

New Zealand High Commission nao hem i doneitem jea long hem.

Ms Enock i hapi bigwan blong save akseptem kif ia mo i se hem ia bae i no helpem hem nomo mbe olgeta narafala pipol wetem spesel nid long fiuja.

“Yu no mas fraet, yu no lukluk long disabiliti blong you, you lukluk long ability blong yu mo wanem we yu save mekem. Tugeta yumi soem long olgeta fren mo famili blong yumi se nomata yumi lif wetem disabiliti mbe yumi stil save plei spot,” hem i talem.

Wetem niufala jea ia bai i mekem tim emi save travel wetem long fiuja mo tu bai i mekem Elie i save kompit long Javelin, Discus mo hammer throw.

President blong Vanuatu Paralympic Komiti, Margret Macfarlane i talem se everidei hemi wan janlens mbe hemi traem bes blong provaedem wan gud fiuja blong olgeta pipol wetem spesel nid.

Hem i talem se hem i gat strong tingting blong leftemap tingting blong ol pipol wetem spesel nid.

“Fulap taem mi stap long trening session blong olgeta, mi krae from mi stap lukaotem gud attidude mo hadwok blong olgeta para athletes ia,” Ms Marcfarlane i talem.

Wan representetif blong New Zealand High Commission i talem se wetem niufala jea ia, oli stap hop blong hem i help benefitim Vanuatu Paralympic Committee mo tu Elie Enock long olgeta trening blong hem.

Olgeta we oli stap long handing ova ia emi Daerekta Jenerol blong Ministri blong Yut mo Spot Divelopmen Henry Vira, wan representetif blong New Zealand High Commission, Emploia blong Elie Enock wetem olgeta Staff blong Vanuatu Paralympic Committee.