Wednesday, July 1, 2026
21.1 C
Port-Vila
Wednesday, July 1, 2026
Taep lo ples ya...
Home Blog Page 313

Cricket tim blong ol man i faet from BetBarter T10 Cricket win

admin
-
0
Cricket tim blong ol man i faet from BetBarter T10 Cricket win

Tri top cricket tim blong Vanuatu oli stap faet blong ko long final blong BetBarter T10 Cricket.

Tufala raon tu wina hemi Mele Tafea Bulls mo Ifira Sharks. Even ia hem i bin tekem ples long last Saturday.

Ifira Sharks mo Mele Tafea Bulls hem i bin plei long raon tu kompetisen mo i lukim tim Ifira Sharks hem i bin win long foa wickets ova lo tim Mele Tafea Bulls.

Long seken raon blong men’s nasonal T10 cricket kompetisen i lukim olgeta pleia oli bin bat strong lo fil mo traem blong skorem moa wickets mbe lo semak taem oli traem bes blong pleim wan gud kem.

Las kem long dei ia i lukim Mele Tafea Bulls hem i bin winim matj blong hem ova long Mighty Efate Panthers long tri wicket.

I gat ten matj everi wan blong pleim mbe naoia i gat six moa matj i stap bifo kompetisen ia hem i en.

Ol famili mo ol fren blong olgeta pleia ia oli bin sapot bigwan truaot long dei ia.

From olgeta pleia oli plei long ol raon, bai ol tim oli pleim bak olgeta tri taem blong faenem se wanem tim nao bai emi aot long kompetisen.

Raon tri kompetisen bai i tekem ples long Satedei wiken ia.

Ol jalense blong Vanuatu Paralympic tim

admin
-
0
Ol jalense blong Vanuatu Paralympic tim

Vanuatu Paralympic Komiti i talem se fulap pipol i luk postponed blong 2020 Paralympic kem olsem wan crisis long saed blong trening, planning mo tim manejmen.

Presiden blong Vanuatu Paralympic Komiti, Margaret MacFarlane i talemaot tru long wan pres rilis se fasin blong muvum kem ia hemi wan jalenj, be long semtaem i kivim janis long olketa athlete blong pripea gud from intanasonal spot event ia.

Mrs MacFarlane iko hed blong talem se Vanuatu Paralympic Komiti i jes identifyem ol koj, blong kivim trening.

Hemi talem tu se oli setemap ol provinsial tim long Luganville, Lakatoro, Isangel mo Port Vila, mo luk se oli kat bus fea blong trening blong olgeta long tri taem long wan wik, mo hemi kavaremap tu sam equipmen blong oli tren wetem.

Ol Vanuatu Paralympic athlete oli bin mekem saskses long Mini Games, Commonwealth Games, Pacific Games, Melanesian Championships mo Queensland Championships mbe komiti emi filim se ol ajivmen ia emi jes wan stat nomo.

Hed koj blong Vanuatu Paralympic, Deni Kalenga, i talem se ol para-athlete oli no kat tumas experians, mbe wetem moa trening bae oli save mekem gud risal.

Sam long olgeta athlete blong Vanuatu Paralympic i kat Mathias Nakat blong Tanna, Nathias Elie Enock mo Marceline Moli.

Mathias Nakat we hemi stap ron long 100 mita, Ken Kahu long eria blong javelin, Elie Enock long javelin, shot put mo discuss, mo Marceline Moli long track mo fil even.

Presiden blong Vanuatu Paralympic Komiti i talem tu se hemi wan taem blong young squad blong Vanuatu Paralympic iko hed wetem ol trening blong ol, mo impruv.

 

Vanuatu Netball Association i holem wan helt awareness long Onesua

admin
-
0
Vanuatu Netball Association i holem wan helt awareness long Onesua

Wan helt awareness blong COVID 19 mo Non-Communicable Disis i tekem ples long  Onesua Presbyterian College long tete.

Hemi toktok blong Virginia Taravaki, kaontri Coordinata blong Vanuatu Netball Assoication.

“So mifala i tokbaot COVID 19 mo efekt blong Non-Communicable Disis blong save givhan long olketa long hao blong stap sef,” hemi talem.

“Mifala i signem wan contract tu wetem Onesua Skul blong sitemap wan sub-association blong netball mo ranem olketa trening wetem ol tija mo studen.”

Mrs Taravaki i talem se ol studen ia i bin listen wetem bigfala interes mo tu pat long sam fun activiti we association blong netball i ranem.

Hemi talem se association emi stap luk fowud tu blong hostem sam even long ol manis we i stap kam.

Ol lokol i showem intres long spot ia billiard

admin
-
0
Ol lokol i showem intres long spot ia billiard

Olgeta pipol blong Mangaliliu kasem Paonganisu oli bin kat jans blong pleim spot ia billiard long fes taem.

Event ia we oli singaotem Pool kem kompetisen emi tekem ples long wan resort lo Not Efate mo Pacific Group Limited nao emi sponsarem wetem olgeta narafala sapota blo kompetisen ia.

VBTC sport emi bin tok tok wetem kem Maneja, Jeffry Pakoa mo emi talem se wetem event ia emi blong bringim olgeta komuniti i kam tugeta blo kat wan gud taem mo semtaem lanem hao blong pleim kem ia.

” Tink tink blong kompetisen emi blong traem unitem olgeta komuniti long Not Efate blong kam tugeta mo mekem wan divelopmen blong helpem olgeta long Fiuja.” 

Mr Pakoa emi kontinu blong talem se blong mekem wan kind aktiviti olsem emi blong pruvum se i tru, ol komuniti i save wok tugeta long ol projek o wan aktiviti olsem o nokat.

“Wetem kem ia emi wan pair kompetisen o tu pipol long wan tim,” hemi talem.

“Billiard emi wan niu kem we oli jes introdusim long olgeta lokol long Not Efate, bai umi talem se umi no save talem se wanem nao emi intres blong olgeta pipol long Not Efate abaotem kem ia, beh umi holem kompetisen ia nao blong finemaot sapos olgeta lokols oli kat intres long kem ia o nokat.”

Mr Pakoa emi talem long las tok tok blong em se sapos resal blong kem i ko gud,bai oli jes luk luk blong setemap ol pool table long olgeta komuniti ia.

VNPF i givim aot soft loan

admin
-
0
VNPF i givim aot soft loan

Vanuatu National Provident Fund i apruvum finis soft Loan blong helpem olgeta victim blong Tropikol Saeklon Harold (TC).

Softloan ia hemi blong helpem ol victim long ol provins blong North, we cyclone i afektem olketa.

Mo hemi no kavremap ol provins we cyclone ino afektem olgeta.

Olgeta forms blong loan ia bai emi made available long olgeta branj blong VNPF lo olgeta outa islands blong Vanuatu we oli bin afekted by TC Harold mo tu long website blong olgeta blo ol pipol oli save fulumap ol forms ia online.

VNPF emi stap wok long olgeta loan forms ia eit.

VBTC nius emi tok tok wetem Generol Maneja blong VNPF Parmod Archary mo emi talem se ol soft loan ia bai emi semak olsem COVID-19 loan we oli bin tekemaot.

Mr Archary i explainem process we VNPF bai i wok folem blong save rilisim ol loans ia.

Hemi talem se taem wan man i apply, hemi must providem evidens tru long National Disasta Manajmen Ofis se property blong hem i bin damej.

Hemi talem se VNPF bae i stat off wetem VT100,000 beh sapos wan wan memba i wantem karem moa than amaont ia, bai oli jajem olgeta from interest we bai emi below eight percent.

General Maneja blong VNPF i konfirmem se ol tim blong VNPF bae iko long ol aelan we oli afekt, mo  mekem assesment blong olketa.

Mr Archary i talem se mane we wan wan memba blong VNPF bae i aplai from, hemi mane blong olketa, mo hemi impoten blong oli usum mane ia blong bildim bak ol hom blong olketa.

Ten bill blong fes ordinari siting blong Palemen

Patience Mawa
-
0
Ten bill blong fes ordinari siting blong Palemen

Fes odineri siting blong palemen long namba 12 lejisleja bae i dibetem ten kavman bill evriwan.

Sitting bambae hem i stat long 11 June mo ko kasem 19 June. Folem March 2020 Nasonal Eleksen, niu Palamen hem i mit blong fes taem long 20 April.

Ol bill weh bae oli debatem oli fokas long ekonomik isiu.

Majoriti blong ol bill ia hemi ol act we kavman i wantem mekem amendment long olketa.
Raymond Manuake, Klak  blong palemen, i talem se olketa ten bill ia i kat;

  • Bill for the Financial Dealers Licensing (Amendment) Act No. of 2020
  • Bill for the National Payment System Act No. of 2020.
  • Bill for the Value-Added Tax (Amendment) Act No. of 2020.
  • Bill for the Statute Law (Miscellaneous Provisions) Act No. of 2020.
  • Bill for the Companies (Amendment) Act No. of 2020
  • Bill for the Tax Administration (Amendment) No. of 2020.
  • Bill for the Parliament (Members’ Expenses and Allowances) (Amendment) Act No. of 2020.
  • Bill for the Supplementary Appropriation (2020) Act No. of 2020.

Tu narafala bill blong debetem bae i dil wetem foren mo sosol isiu. Olgeta bill ia hem i Bill for the Adoption Act No. of 2020, Bill for the Treaty between the Solomon Islands and the Republic of Vanuatu concerning their Maritime Boundaries (Ratification) Act No. of 2020.

VBTC nius i kasem infomesen se long saed saplimentri apropriesen bill, hemi meinli abaot stimulus pakej mo nara spendem blong kavman.

Tabu blong kilim pidgin

Newsroom
-
0
Tabu blong kilim pidgin

Ministri blong Climate Change i apil bagegan long ol pipol blong no kilim ol pidjin mo ol flying fox.

Dipatmen blong Environmental Protection mo Conservation i mekem apil ia, afta we hemi ko hed blong kasem ol ripot se pipol i stap kilim ol pidjin mo flying fox long ol aelan we Cyclone Harold i afektem olketa.

Direkta General blong Ministri blong Climate Change, Esline Bule i talem se Nasonal Disasta Komiti i mekem wan disisen finis se hemi tabu blong kilim ol animal ia long ol aelan we oli afekt.

Mo hemi mekem wan leta tu iko long ol provins mo ol komuniti lida blong mekem sua se ol pipol blong olketa i tekem kea long olketa animol.

Manples i mas holem ol lokol posisen: Laba Komisina

Newsroom
-
0
Manples i mas holem ol lokol posisen: Laba Komisina

Vanuatu kavman i bin kivim notis i ko long ol bisnis haos blong mekem se ol manples i holem ol posisen blong ol lokol.

Hemia i folem wan instraksen we niufala Minista blong Intenel Afea, Ishmael Kalsakau, hemi mekem.

Dipatmen blong Leba i stap kontiniu yet blong kivim instraksen ia long ol business haos.

VBTC hemi witnisim se i kat sam shop long taon oli gat ol forena istap long ol posisen yet olsem cashier o iven shop securiti ofisa.

Wael dipatmen i stap mekem yet inspeksen blong hem, ikat sam faending we tim blong leba i faenem long ol bisnis haos.

Komisina blong Leba, Murielle Metsan Meltenoven, i talem se fulap long ol expatriete woka we oli stap wok long sam long olgeta resev okupesen ia, oli kat krin paspot.

Ol risev okupesen ia, anda long loa blong emploimen, i alaowem nomo ol Ni-Vanuatu blong mekem wok ia.

Ol wok olsem securiti, kashia, hea dresa, resepsenis mo fulap narafala wok we ol Ni-Vanuatu oli save mekem.

I no hemia nomo, be i kat tu sam bisnis haos we oli risivim finis notis blong leba be yet oli kontiniu blong emploem ol woka long ol wok we wan Ni-Van i save mekem.

Komisina Meltenoven i talem se taem tim blong hem i finisim ol inspeksen we oli stap mekem, bai oli ripot i go bak long Kavman tru long Minista blong olgeta.

Mo Minista nao bai i mekem wan disisen folem ol faending we leba i presentem long hem.

1...311312313Page 313 of 313

Categories

Links

Stay connected

- Advertisement -spot_img
  • https://radio.vbtc.vu/radiovanuatu
  • Radio Vanuatu
  • Radio Stations
  • https://radio.vbtc.vu/paradisefm
  • Paradise FM
  • Radio Stations
  • https://radio.vbtc.vu/femmefm
  • Femme Pawa
  • Radio Stations