Opposition i talem se hem i gat bigfala konsen long fasin we ol ofisel blong Kavman oli stap benem loa.
Leader blong Opposition, Ralph Regenvanu, i talem se oli gat konsen long namba blong ol insiden ia we i stap kamaot long media naoia.
“Mifala i gat konsen long namba blong ol insiden naoia we i ripoted long media we ol bureaucrats oli stap benem ol loa blong implementem politikol disisen we hem i unlawful, ol apoinmen, investikesen, i nogat lawful besis mbe oli stap mekem from i gat politikol presa blong oli mas mekem sam samting,” Mr Regenvanu i talem.
“Ating everiman i save luksave hem ia mbe hem i no stret. Hem i wan samting we ol bureaucrat, pablik seven, polis man, yumi ekspektem se yu folem rul of loa, yu folem propeli, yu no tantanem yu depending long hu ia i involve mo hu ia i stap mekem komplen.”
Public Relations Ofisa blong Kavman, Fred Vurobaravu, i talem se politikol apoinmen olsem i bin hapen semak long pass Kavman.
Hem i talem se sam apoinmen ia bae i gat riviu long hem mo sam disisin bae i tekem ples long advaes blong Kavman.
Mr Vurobaravu i talem se Kavman blong tede i stap lukluk sirias blong riviu plante apoinmen long pablik seves we oli no folem proses mo merit.
VBTC i andastanem se Kavman hem i apointem Trade Commissioner, Paul Okten, i ko long Kazakstan we Minister blong Foreign Affairs, Mark Ati i mekem long namba 20 blong manis ia.
