On-the-job training hem i valuabol blong bildim skil mo knolej blong ol wokman blong mekem i moa isi blong leftemap ol wokman wetem wok blong olgeta. Hem ia hem i impoten tumas blong ol training institusen blong mekem sua se trening hem i mitim nid blong wok ples mo indastri.
Australia Pacific Training Coalition (APTC) mo Anglican Church blong Melanesia Vocational Education mo training School (ACOMVETS) i makem wan histri long patnasip blong olgeta tru long profesonal atajmen blong ol traina blong ACOMVETS wetem APTC.
Fes man blong benefit long profesonal atajmen ia hem i Yankie Hinge, wan experians carpentry trainer blong ACOMVETS Lorevuilko Rural Training Centre (RTC).
Yankie hem i graduate wetem APTC Certificate III long carpentry long 2016 mo hem i bin stap dilifarem Vanuatu Qualification Authority (VQA) Certificate I long Carpentry i ko long ol studen long sentrol mo noten aelan.
Yankie hem i tekem training blong mentor long profesonal atajmen ia wetem carpentry trainer Baker Bruce mo tu long saed blong applied learning in training quality mo compliance.
“Mi hapi tumas blong pat long bigfala tim ia mo lanem moa abaot ol traning delivari method mo asesmen proses,” Mr Hinge i talem.
Atajmen ia bae hem asistim hem blong leftempa ol training method blong hem taem hem i kobak long Lorevuilko RTC.
Mr Bruce i talem se profesonal atajmen ia bae hem i helpem Mr Hinge blong dilivarem ol standard traning i ko long ol yang pipol blong Vanuatu.
“Olsem wan nasonal trena, hem i gud blong serem knolej mo ol skil ia wetem narafala trena blong hem i save tekem i kobak i ko long ol student blong hem,” Mr Bruce i talem.
Chief Executive Officer blong ACOMVETS’, Father Willie Ben Tabi, hem i glad tumas blong luk se patnasip ia hem i prokres.
Hem i aknolejem APTC from tinktink ia blong ofarem kapasiti bilding trening ia blong Mr Hinge.
“Olsem Vanuatu Qualifications Authority hem i stap prosesem apruvol blong deliva ol trening long Lorevuilko training centre, ol skill we Yankie hem i stap akwaerem long APTC bae hem i veri useful,” Father Ben i talem.
Hem i kontinu blong explenem se wetem ol niu skil we Mr Hinge hem i kasem, bae hem i save deliva mo asesem ol kos blong Vanuatu Qualification Authority taem oli stat blong ofarem long Lorevuilko.
APTC Country Director blong Vanuatu mo Nauru, Anna Naupa, i talem se ACOMVETS-APTC patnasip hem i impoten blong promotem technical mo vocational edukesen mo trening patwei long Vanuatu.
“APTC hem i valuem patnasip ia wetem ACOMVETS taem yumi kontinu blong upskilim ol nasonal trena blong delivarem ol traning mo enkarejem moa pipol blong kasem trening long eni TVET kos,” hem i talem.
Mr Hinge hem i spentem tu manis long APTC mo stap trenem ol studen wetem Certificate III long Carpentry blong APTC.
