Ol kastoma blong Digicel mo Vodafone oli mas regista bifo Desemba long yia ia sosno bae oli lokem SIM kad blong olgeta mo bae seves provida oli faen VT20 milien.
Telekomunikesen, Radiokomunikesen, mo Brodkasting Reguleta (TRBR), i wantem ol fon usa blong registarem ol sim blong olgeta folem wan rekulesen blong olgeta wetem pepos blong stopem ol kiaman usa (fake ID) mo kiaman infomesen.
TRBR hemi konfem se ol penalti we i stap bae aplae i ko long tugeta Kastoma mo Provida blong ol SIM kad.
Wan Maneja blong Maket, Kompetisen mo Konsuma Affea blong TRBR, Roger Jimmy, hemi talem se niu dedline ia oli muvum i ko long Desemba from i gat sam usa we oli nogat akses long ol seves provida blong olgeta.
“Mi bilif se tufala kampani bae hemi diactivatem SIM kad, from tufala kampani ia nao bae pem faen i no kastoma be kampani,” hemi talem.
“Reguleta hemi isuem wan leta i ko long kampani yet blong mifala i extendem another twelve months, so yumi extendem i ko long Desemba 2024 bakegen blong ol kampani ia bae save registarem ol kastoma blong olgeta.”
VBTC hemi karem konfemesen se kampani blong Vodafone hemi traem blong givhan long olgeta pipol we i no registarem SIM kad blong olgeta yet mo kasem naoia oli bin regista 70 kastoma nomo.
Wan Rodshow Kodineta blong Vodafone, Rodney Gideon i talem se oli stap traem blong helpem ol narafala aelan long kantri tu blong regista.
“So far mifala targetem Malekula, Tanna, Santo, Pentecost, Ambrym, ol tim lidas blong mi i go aot blong mekem registresen,” Mr Gideon hemi talem.
Olgeta i fesem tu fulap jalenj olsem long rod mo pipol oli finem i had blong akses ol seves provida mo ol diferen taem we ol man long ol aelan oli stap wok folem.
Hemi talem se olgeta long Vodafone bae i folem disisen blong TRBR, long wanem bae happen long olgeta we i no regista.
“So sapos oli no regista yet, bae oli karem penalti long hem, either bae oli pem faen or bae mifala deactivatem sim blong olgeta, so mifala folem nomo wanem TRBR i talem.”
Digicel hemi talem tankiu long olgeta we regista finis mo hemi tokbaot se hemi impoten tumas blong ol kastoma blong olgeta oli mas regista tu.
Maketing mo Komunikesen Ofisa blong Digicel Office, Christopher John Quinto hemi komen se hemi impoten blong ol kastoma oli mas regista kwik taem.
“Komitmen blong yu hemi blong kipim koneksen hemi sef oltaem mo bae helpem yumi tugeta,” hemi talem.
“Olgeta we no regista iet, mifala i enkarejem ol kastoma blong regista tudei. Hemia wan top prioriti blong Digicel mo TRBR.”
TRBR i encarejem ol kastoma blong tufala telekomunikesen kampani ia blong oli mas traem blong registarem ol sim blong olgeta bifo manis blong Desemba long yia ia.
