Director blong Foreign Affairs i talem se, Kavman i no foketem ol studen blong Vanuatu, we oli stap stadi ova sea mo bae oli pat long ol repatriation flaet.

Yvon Basil i talem long VBTC tokbak sho se, ol studen long China mo ol narafala kaontri oli mas folem wan flaet i kam kolosap long ol mein port blong entry blong yumi olsem Australia mo New Zealand blong oli save kambak long Vanuatu.

Hemi talem se sem proses we oli bin arenjem long fes repatriation bae i happen long seken wan.

“ Ol studen blong yumi long Shanghai, i kat ol flaet everi dei long Shanghai kasem Auckland long New Zealand,” Mr Basil i talem.

“Mo yumi stap wet blong finolisem gud ol flaet wetem Air Vanuatu mo askem olketa blong konek wetem ol flaet ia.

“Advaes we mifala i stap givim long ol pipol blong Vanuatu ova sea se,  oli mas mov i ko long ol mein port blong entri blong yumi olsem Australia, New Zealand, Fiji mo New Caledonia.”

Mr Basil i talem se tu se, bodi blong leit High Commissioner blong Vanuatu long New Zealand, i kasem Port Vila tete afternun.

Hemi talem se, cofin blong hem bae i spendem 14 dei long wan fasiliti long airport, bifo hemi i ko long ol famili.

“14 dei ia, hemi blong mekem se ol famili we oli kam wetem ded bodi blong leit Mr Naviti, oli vinisim 14 dei kwarentin blong olgeta festaem wetem ol nara pipol we oli kam tu,” Mr Basil I talem.

“Mo afta 14 dei, kavman i bae i jes mekem wan ofisel protocol blong hem.

“Narafala cofin we hemi long wan Recognised Seasonal Employee wokman bae i ko stret long olgeta famili we i stap long Vila blong oli putum i ko long Ambrym.

Royal New Zealand Force plane, we Kavman blong New Zealand i pem bai i mekem repatriation flaet ia tedei, long haf pas tri.

Leit High Commissioner blong Vanuatu, Johnson Naviti mo seasonal wokman, Kenneth Worwor i lusum laef long New Zealand.

Mo i kat ova 100 pipol i kam long flaet ia.