Ministry blong Finance mo Economic Management i advaesem ol smol mo medium bisnis blong mas rejistarem gud ol bisnis blong olgeta mo mas gat binis license blong oli save kasem stimulus pakej blong Kavman.
Director General blong Ministry blong Finance mo Economic Management, August Letlet, i talem se fulap long ol smol mo medium bisnis oli no bin rejistarem gud ol bisnis blong olgeta mo oli nogat licence we i alaoem olgeta blong mekem bisnis.
Hem i talem se hem ia i mekem i had blong oli save kasem stimulus pakej blong Kavman.
Director General Letlet i talem se wan long olgeta risen blong Kavman blong setemap criteria blong bisnis License ia, hemi blong faenemaot tu se hamas bisnis long Vanuatu oli folem proses blong rejista mo hamas i no rejista.
Mr LetLet i talem se wetem stimulus pakej ia, i faenem aot se fulap smol mo medium bisnis olsem ol handicraft bisnis, oli no bin rejistarem bisnis blong olgeta wetem Kavman.
Hem i talem se hem ia i mekem se kasem naoia olgeta smol handicraft bisnis ia, oli no risivim yet stimulus pakej blong Kavman.
Mr LetLet i mekem toktok ia blong respon long sam konsen we wan handicraft ona i bin mekem long taem blong Economic Recovery Post COVID-19 mo TC Harold Forum las wik.
Hem i talem se ol smol mo medium bisnis oli plante so Ministry i still stap saenem ol pepa blong ol bisnis ia yet.
Sarah Tari long Women’s Export Association blong Vanuatu (WEAV), we hem i ripresentem ol handicraft vendor, i askem long Kavman blong no mas livim olgeta bihaen.
Hem i talem se naoia fulap vendor blong handicraft oli jas stat blong mekem bisnis license mo i hop se Kavman i rilisim pakej ia long olgeta.
“Mifala long haus blong handicraft stret afta we ol boda oli klos, 95 pesen blong maket blong mifala hem i stop long taem ia,” Ms Tari i talem.
Hem i aknolejem Smol mo Medium Enterprise (SME) Pakej we Kavman hem i bin alaoem mo talem se oltow oli no risivim yet mbe bae oli peisen mo wet from.
Wan Handicraft Vendor long Haus blong ol Handicraft long Port Vila, Purity Eric, i talem se “Insaed long Haus blong Handicraft, mifala fulap i bin aplae from stimulus pakej. Kolosap mifala everiwan i aplae. Ating faev nomo we oli nogat bisnis license blong 2019 mo 2020 we oli no bin aplae.”
Mr LetLet i apil long olgeta smol bisnis long Vanuatu blong mas rejista blong mekem se long fiuja taem kaontri i go tru long wan crisis be oli save kwalifae long eni disisen blong Gavman.
