Kavman tru long Depatmen blong Leba hemi lukim opotuniti we ol sisenol woka oli kat blong save bildim ekonomi tru long ol lokol bisnis.
Vanuatu Kavman wetem patnasip blong Australia, New Zealand mo Vanuatu Labotori (V-LAB) oli lonsem Yumi Growem Vanuatu prokram las wik, blong helpem ol sisenol woka blong lanem hao blo statem wan bisnis long kauntri.
Komisena blong Leba, Murielle Meltenoven hemi talem se long nekis 5 – 10 yia, bae yumi lukim plante lokol bisnis insaed long domestik maket blong yumi.
“Bambae oli mas tingbaot retiremen o exit strategy blong olgeta,” hemi talem.
Hemi tok moa se prokram ia hemi stap long aelan blong Efate mo Santo mo bae kat plan blong hemi save kasem ol nara aelan long futja.
“Prokram ia hemi wan long ol gudfala opotuniti we hemi save helpem ol returning woka ia, oli ko mo oli kambak be at least oli save investem income blong setem ap ol own bisnis blong olgeta blong sapotem famile blong olgeta long wan long-term.”
Yumi Growem Vanuatu prokram we V-LAB hemi fasilitatem, hemi tekem 50 patisipen we hemi ol sisenol woka blong ko tru long ol woksop mo trening blong 10 manis wetem ol bisnis koj blong olgeta.
Wok blong wan bisnis koj hemi blong helpem olgeta save hao blong raetem wan bisnis plan mo bilidm interes blong olgeta lo wanem kaen bisnis oli wantem kat long saed blong transpot, akrikalja mo retail.
“Koj long bisnis hemi normally wan storian blong givhan wetem wan bisnis man o bisnis woman,” Koj David Joel hemi talem.
“Mifala no talem samting blong mekem be mifala i enablem hem blong hem nao i discoverem solusen.
“Hemi save luk opportunity long wanem dream blem, hao nao blong stat, hao nao wokbaot blem blong ko achievem blong kam wan successful entrepreneur.”
New Zealand Hae Komisena, Her Excellency Nicola Simmonds hemi talem se New Zealand Kavman hemi wantem lukim moa praevet bisnis, “moa bisnis long Vanuatu we ol man Vanuatu mo ol woman Vanuatu i lidim, so from hemia mifala sapotem.”
Deputi Hae Komisena Emily Fisher hemi talem se bae hemi wan bigfala benefit kolo ekonomi blong Vanuatu mo long olgeta famili blong olgeta.
Leba Depatmen hemi sapotem finis araon 100 sisenal woka blong manejem sam bisnis tru long sam trening prokram.
Hemi namba 3 taem we Kavman hemi karemaot prokram ia mo ikat plan blong prokram ia gro long futja wetem inkris long ol namba blong ol patisipen.
