I kat fulap komplen mo wari long ol seasonal wokman long Australia konsenem low salari we oli stap kasem.
Commissioner blong Labour, Murielle Metsan Meltenoven, i talem se oli kasem ol komplen long ol seasonal wokman we oli pat long Seasonal Workers Program long Australia se oli no stap mekem mani long ol fam we oli stap wok long hem.
“Ol haoa blong wok long olketa fam i ko daon mo mo oli no tritim gud olketa long ol fam we oli wok long hem,” hemi talem.
“Nao yumi ol man Vanuatu, yumi kat wan fasen blong respek afta taem yumi expos long ol kaen tritmen olsem bae yumi fil nogud lem mo bae yumi faenem ol wei blong ronwe.”
Mrs Meltenoven i talem se olgeta isu ia nao i mekem ol seasonal wokman oli stap leko ol fam we oli kat ol visa wetem mo ko wok long ol nara fam long Australia.
Wan seasonal wokman blong Queensland we i no wantem talem nem blong hem, i talem se fam we oli wok long hem, ol nara wokman oli ronwe vinis mo ko wok long ol nara fam from oli no hapi long salari blong olgeta.
Hemi talem se wok long karen blong banana hemi wan had wok ia mbe mani we mifala i stap kasem i smol tumas aot long bigfala wok we mifala i stap mekem everi dei.
“Amaon blong mani we mifala i sud tekem long wan wik hemi VT 100,000 mbe naoia mifala i stap tekem araon VT 70,000 nomo,” hemi talem.
“Wan fren blong mi i bin soem pay slip blong hem mo mi luk VT20,000 nomo, pay blong wan wik mo mifala i luk se i no stret nomo.
“Wok blong banana hemi moa had bitim ol nara fam from mifala i stap katem daon mo karem ol bigfala banana ia.
“Mi hop se kavman i luksave had wok blong mifala long Australia mo adresem isu ia kwiktaem.”
Commissioner Meltenoven i talem se naoia, Hae Komisina blong Vanuatu long Canberra i stap wok kolosap wetem Kavman blong Australia blong adresem ol isu ia.
“Tufala othoriti ia i stap investiketem ol isu ia mo mifala i stap wok kolosap wetem olketa blong oli kasem ripot,” hemi talem.
“ Taem ripot i kamaot, mo i kam long ofis blong labour bae yumi luk hao yumi save adresem isu ia.
“I tru se problem i stap vinis mbe mi biliv oltaem se i kat wei blong fixim olgeta.”
Joseph Lingmal, wan nara seasonal wokman long New South Wales, i talem se oli wok long Costa Farm mo oli tekem gud mani long fam ia.
Hemi talem se i kat sam nara wokman oli kam wok wetem olgeta from pay i low.
Wan Recognised Seasonal Employer blong New Zealand i talem se fam we oli wok long hem oli pem gud olgeta nomo.
“Mo hemi no stret blong ol nara wokman oli stap ko tru long kaen rabis fasen olsem,” hemi talem.
