Labour Dipatmen i stap priperem gud olgeta seasonal wokman we bae oli stap kobak wok long Australia i no longtaem.

Long late Julae, Labour Dipatment, i bin anaonsem se wan totol blong 170 Ni-Vanuatu wokman bae oli ko wok long ol mango fam long Noten Teretri blong Australia.

Long wik ia Dipatment blong Labour, Agriculture mo Foreign Affairs i okanaesem wan impoten brifing blong priperem olgeta woka ia long wok we bai oli ko mekem long Australia.

Commissioner blong Labour, Murielle Meltenoven, i talem se i gat fulap jalens mo isiu we dipatmen ia i stap fesem naoia blong dil wetem ol wokman. Ol isiu olsem, taem wan wokman i go involve long alcohol mo gat rileisensip taem hemi stap ovasea.

Hem i talem se hem ia oli no wandem luk i hapen bakeken wetem grup we oli stap priperem olgeta naoia blong go wok long ol mango farm long Australia.

“Yumi long Labour, yumi stap kontinu blong provaedem enkarejmen toktok, yumi stap kontinu blong provaedem ol infomesen long wanem nao olgeta impoten samting we wokman i ekspektem blong hemi save sovaef wetem long Australia long period blong contract blong hem,” Ms Meltenoven i talem.

“Yumi also traem bes blong priperem ol wokman blong yumi in advance taem oli kasem long Australia oli well inform long ol isiu we likely se i save happen mo yumi also stap remindem olgeta long behaviour isiu blong olgeta.”

Director blong Agriculture Department, Antoine Ravo, we i stap long impoten brifing ia tu, i talem se wanem we olgeta oli stap traem blong mekem hem i blong enkarejem ol wokman blong taem oli kam bak long Vanuatu oli mas aplaem skills mo knowledge we oli bin go lanem long Australia.

Hem i talem se mo bae Kavman i helpem olgeta long wanem bisnis we oli wandem statem.

“Slogan blong integration framework blong Departmen blong Agriculture hemi yu go olsem wan wokman mo yu kambak olsem wan lokol investa long Agriculture sector,” Mr Ravo i talem.

“So, mifala i tekem janis ia blong mifala i kivim sam tingting mo aweanes mo kivim sam daerektif blong ol wokman ia taem oli ko, taem oli stap wok long we, be oli mas tingbaot se wanem nao opsen we bai oli kam bak blong inves long hem long Vanuatu.”

Wan long ol wokman ia i talem tankio long Kavman long janis we oli kivim blong save go aot mo earnem mani long Australia.

“Mifala i go winim bak mani, mo mifala i lanem ol praktis olsem pruning, harvestem mango mo kam bak long Vanuatu blong helpem family blong mifala long situation olsem ia we i gat COVID-19,” Wokman ia i talem.

“Mi wandem addem ap blong talem bikfala tankio long Kavman blong Vanuatu mo Australia, tankio we situation ia i stap wetem mifala, mifala i nokat wok blong mekem long Vanuatu, be mifala i ko bak blong raisem sam mani mo kam helpem ol family blong mifala.”

Kavman i stap hope se 170 wokman ia bai oli flae aot long en blong manis ia.