Ministri blong Agriculture i plan blong helpem ol seasonal wokman blong tekpat long agrikalja.
Acting Deputi Direkta long Dipatmen blong Agriculture, Mark Vurobaravu i talem long VBTC se hemia blong mekem se ol wokman blong Recognised Seasonal Employer mo Seasonal Workers Program oli yusum save we oli lanem long nara kaontri blong developem graon blong olketa.
“Pat blong plan ia hemi blong addressem shotej blong leba long kaontri mo blong helpem ol wokman we oli pat long program blong leba mobiliti long New Zealand mo Australia,” hemi talem.
Mr Vurobaravu i talem se kavman hemi wantem adresem tu, jalens we i stap taem fulap man i travel ova sea long seasonal wok.
“Taem plante pipol i ko ovasea i afektem sekta blong agrikalja,” hemi talem.
“Yumi wantem apskilim ol wokman blong Vanuatu, from save we oli kasem long Australia mo New Zealand, olsem long saed blong horticulture mo Agrikalja long farm, hemi wan benefit blong kaontri. Taem oli kambak yumi wantem se oli kam investem save ia long ples ia bakeken. Mbe long saed blong mane we i kambak long kaontri, yumi wantem daerektem olgeta tru long investmen opsen.”
Ol aktiviti we kavman bae hemi mekem blong helpem ol wokman, hemi bes long interes blong wan lwan long olgeta taem oli kambak long kaontri.
Tony Kalsongi, wan long olgeta Seasonal wokman hemi tokbaot tinktink blong hem long wanem kavman hemi sud putum olsem wan sapot afta long experience we oli lanem.
“I gud taem mifala kambak sapos kavman i save givim sam masineri tul blong i save helpem mifala ol RSE mo SWP woka taem mifala kambak mifala save wok long hem mo i save helpem mifala wetem some skills long wanem mifala lanem aot long we blong mifala save practisim long ol aelen mo ol communities blong yumi.
Mr Vurobaravu i talem se plan ia hemi inkludim tu ol training, statem wan agricultral bisnis, sapotem community coperative, indrodusem ol sabsistance farming mo helpem ol existing agriculture initiatif we i stap vinis.
“Hemia i wan plan we ministry hemi developem wetem Leba ofis mo ol nara sekta mo sapot i kam long Gavman blong Australia mo New Zealand,” hemi talem.
