Ministry blong Health i wonem ol pipol we oli stap long kwarentin blong oli mas rispekem ol rul blong COVID-19.
COVID-19 Spokespersen, Len Tarivonda, i talem se ol pipol i no alao blong drink alcohol o kava taem oli stap long kwarentin.
Hemi mekem toktok ia afta we oli faenem se tri pipol oli bin drink alkohol long wan long olketa kwarentin fasiliti long Port Vila.
Vanuatu Polis Force i stap putum tugeta wan ripot long brij blong kwarentin rul.
Vanuatu Polis Force i talem se i risivim ripot long Sandei naet long wan long ol polis securiti we i stap long kwarentin fasiliti ia mo talem se tri pipol long wan rum long fasiliti ia, oli bin dronk mo hem i sikim advaes mo aksen long isu ia.
Polis Fos i advaesem ofisa ia blong monitarem gud ol dronk man ia.
Fos i talem se oli mekem aweanes finis mo advaesem ol pipol ia long ol rul mo penalti blong brekem eni rul blong kwarentin.
Vanuatu Polis Fos i talem se oli komplitim ripot blong isiu ia vinis blong stret otoriti i dil wetem.
Mr Tarivonda i talem se i nogat loa blong mekem se oli givim faen long ol man we oli brekem ol rul blong kwarentin mbe oli stap wok blong mekem jenis long Act blong Public Health blong alaoem faen.
Hemi talem se wetem hemia, Air Vanuatu hemi stap kontinu blong mekem ol flaet blong repatriation.
“Nambatu repatriation flaet blong wik ia i kam long New Caledonia wetem 12 pipol,” Mr Tarivonda i talem.
“ I kat wan namba blong 162 man mo woman oli bin kam long flaet blong New Zealand long Thursday afternoon mo oli stap long kwarentin naoia.”
VBTC news hemi understanem se olgeta diplomat we oli kam long flaet blong New Zealand ia, oli mas pem own kwarentin blong olgeta.
Director blong Foreign Affairs, Yvon Basil, i konfemem se bai i kat tri nara flaet bakeken long manis ia be i kat posibiiti se namba blong pasenja bae hemi ko down from size blong kwarentin.
Vanuatu hemi kat capaciti blong kat 650 pipol nomo long kwarentin long wan taem.
