I kat 5 aelan long Torres wetem hae populesen blong 1190 pipol we oli stap aksesem seves blong Air Vanuatu wan wan taem nomo long 1 wik.
Ol pipol oli stap askem Kavman risponsibol blong bildim ap 2 flaet long Linua airport long Torres mo hemi wan long taem rikwes.
Kasem long yia oli still fesem semak isu ia yet blong kat wan flaet nomo long wan wik.
Polis Ofisa long Torres, Clovis Tapigerian hemi talem se evri Mandei hemi mas stap long Linua airport blong provaedem sekuriti long ol pipol from ol man oli stap fos blong flaet mo fos blong fretem ol items blong olgeta.
Wan Nurse long Torres, Jonathan Pita hemi talem long VBTC Nuis se olgeta Emergency mo ol bigfala sik oli stap referem iko long Northern Hospital long Santo.
“Oli stap usum Air Vanuatu, be wetem wan flight nomo long wan wik hemi no naf from emergency emi save kam eni time,” hemi talem.
Kaonsela blong Torres Konstituensi, Honorobol Winston Elton hemi talem se wetem wan flaet long wan wik long Torres emi wan long time issue finis ikam be oli stap wok blong adem wan mo flaet iko long wan wik ia be kasem tete inogat wan positif respond yet.
Be Air Vanuatu ino gat plan yet long Torres Airport blong addem 2 flaet long wan wik.
By Mika Albie
