Palamen i gat naoia wan niu standing oda afta long 18 yia sins fes draf blong hem i bin kamaot long 2010.
Palamen standing oda hem i ol rul blong Palamen we ol MP oli stap folem long taem blong ol Palamen sitting.
Deputy Clerk blong Palamen, Leon Teter, i talem se long nekis Palamen sitting long Novemba bambae ol memba blong Palamen oli yusum niufala standing oda ia.
Mr Teter i talem se niufala standing oda ia i gat moa ditel long hem. I gat 102 oda blong Palamen kompea long foma standing oda we hem i gat 55 oda nomo i stap long hem.
Mr Teter i talem se niufala standing oda ia bae hem i riplesem foma standing oda we Palamen hem i bin stap yusum sins 1982.
Hem i talem se niufala oda ia hem i kamaot from ol lida blong Vanuatu long 2002 oli tinktink strong se oli mas strengtenem Palamen tru long ol strong rul insaed long standing oda blong mekem Palamen i moa ifektif.
Hem i talem se so, “Fes draf blong niu standing oda ia hem i kamaot long 2010 we tufala memba blong Palamen long tedei, Prime Minister Bob Loughman mo Lida blong Opposition Ralph Regenvanu, i bin push long taem ia blong yumi mas gat wan riviu blong standing oda.”
Mr Teter i talem se mbe from long ol yia ia, Kavman hem i jenis tumas mo ol memba blong Palamen i muv muv tumas mekem ol komiti blong standing oda tu oli jenis mo i tekem olgeta 18 yia blong oli save komplitim niufala standing oda ia.
Hem i talem se taem kavman i jenis ol komiti blong standing oda tu i jenis. Mo taem ol niufala komiti i kam in, olgeta tu i mekem sam jenis long oda ia so ol ting i stap hapen olsem kasem yia ia 2020 taem Palamen i jas apruvum niufala standing oda ia.
Mr Teter i talem se i gat plante draf blong standing oda ia mo final wan we Palamen i apruvum long yia ia, hem i namba 21 draf, so hem i bin ko tru long plante jenis.
Hem i talem se niufala standing oda ia i ridusum namba blong ol standing komiti long eight i kam daon long fo naoia.
Standing oda ia hem i statem stret deit blong tufala siting blong Palamen. Oda ia i talem se fes odinari sitting blong Palamen i mas sidaon long seken Tosdei blong May. Mo long fes Tosdei blong Novemba, seken odinari sitting i mas sidaon.
Mr Teter i talem se mbe long foma standing oda, i talem se fes odinari sitting i sud sidaon long mid Maj mo seken odinari sitting long mid Okis.
“Hem ia i open tumas mo i save mekem se Kavman i save askem spika blong kolem fes odinari samtaem long June,” Mr Teter i talem.
“Semak long rises period blong Palamen, foma standing oda hem i statem se rises period blong Palamen i stat long 20 June kasem 20 July mbe niufala standing oda i jenisim i ko long 15 July kasem 15 Okis.
“Sapos yu lukluk gud tufala deit ia hem i wan taem we plante holidei mo selebresen i stap long hem, we hem i wan taem we plante MP oli wantem stap long ol constituensi blong olgeta long taem ia.”
Rises hem i wan taem we Palamen hem i no mit mo ol komiti blong hem tu oli no mit.
Hem i talem se niufala standing oda ia hem i provaedem tu se oral kwesten, we i bin stap hapen tu taem long wan wik long taem blong sitting, naoia bae i mas gat long everi dei long taem blong Palamen sitting.
Mr Teter i talem se oli serem vinis niufala standing oda ia long olgeta MP mo oli bin ranem wan indaksen kos mo go tru long standing oda ia long olgeta MP.
Palamen i bin apruvum niufala standing oda ia long manis June 2020.
