Ol mama we oli salem kakai long Banban market long Santo oli usum las wik blong holidei ia blong winim mane blong skul fee blong pikinini.
I kat 4 moa dei nomo i stap bifo 2024 Academik yia i stat, ol mama long market oli luk impotens blong invest long edukesen blong ol pikinini blong olgeta.
VBTC nius tim long Santo i toktok long 4 mama we oli kam long difren eria long Santo blong mekem market.
Wan mama we i kam long Balon, Lala Rolley hemi talem se hemi traem had wetem ol pikinini blong hem long saed blong salem aelan cabbage mo kava blong hem i save helpem olgeta long fuja.
Hemia sapos tufala pikinini blong hem oli skul gud mo winim pepa blong skul.
“Market hemi no gud tumas, be as long as mi mekem mane blong save pem bak truck mo smol mane we mi save holem blong fidim ol family blo mi mo pem skul fi blong ol pikinini blong mi,” hemi talem.
Rose Robert we hemi silip long South Santo hemi talem se no mata long rabis rod oli traem had blong winim mane.
“Rod blong mifala i nogud long South Santo be mi try hard blong mekem smol market nomo, blong save pem skul fi blong smol gel blong mi wei bai kam skul long Saint Micheal long yia seven from hemi las wik ia nao bifo next wik skul I stat.”
Wan nara mama we silip long South Santo tu, Susan Marama hemi tok moa long impotens blong pem skul fi.
“Mi kam mekem market long last wik blong skul from next wik ol pikinini blong mifala I skul bakegen mo mi usem las wik blong holiday blong mekem money from skul fi,” hemi talem.
I kat sam jalenj we oli bin fesem taem sam kakai blong olgeta oli nogud from oli nosave salem mo bae oli mas finem wan wei blong salem.
Wan long olgeta wei hemi blong oli mekem praes blong kakai iko daon, praes blong ol cabej, kava mo ol narafala root crops blong mekem se ol kastoma oli save pem kwik taem.
I gat sam mama tu we oli kam blong salem kakai mo blong sevem mane blong ol nara plan blong mekem long yia ia.
Madlen Ham hemi talem se hemi mekem market blong pem smol soap blong hem mo blong sevem mane.
Long Banban market hemi jip be oli pem transport I moa sas from oli travel wetem bigfala kwantiti mo gudfala kwaliti island kakai blong Santo.
By Premilla Hinge
