Hed blong Kavman i talem se, ol developmen partna blong Vanuatu i mas mitim olgeta nid we pipol i kat long taem blong disasta.
Prime Minister, Bob Loughman i talem toktok taem hemi mitim olgeta partna ia, long wan miting long wik ia, long Port Vila.
Prime Minister Loughman i talem se i gud blong kavman mo ol developmen patna blong hem i mas wok tugeta mo kat wan goal nomo.
“Hemi impoten blong yumi ol patna i luk hao bes yumi save kodinatem ol codinesen proses from bambae i helpem yumi long ol disasta we i stap kam,” hemi talem.
Gregoire Nimbtick, Director General long Ofis blong Prime Minister, i talem se, kavman i stap wok naioa long wan National Disaster Policy frame wok we, hemi blong help qaedem wok blong ol respons long futja afta long plante lesen we oli lanem long ol disasta we i pas.
“ Wanem we yumi produsum bae i helpem yumi long hao yumi save respon mo kodinate, buildem bak ol laef moa beta mo hemia nao wanem we yumi stap wok long hem naioa,” Mr Nimbtick i talem.
“Yumi lanem plante lesen long Saeklon Pam, evacuation blong ol pipol blong Ambae folem Volcano mo Saeklon Harold, we yumi stap wok long hem naoia, yumi putum tugeta ol lesen ia afta yumi developmem wan frem wok we bae i helpem yumi blong solvem sam nid we i stap long plan vinis blong help respon moa gud long ol disasta.”
Evic Durpaire, Chief blong United Nations International Children’s Emergency Fund (UNICEF) field ofis i talem se miting ia hemi wan gudfala stat long recoveri blong wan disasta.
Hemi talem se plante difren dona mo agency includum olketa, i lukluk long hao blong wok blong mekem sua se ol pipol we oli stil sava long Saeklon Harold mo olketa we oli faenem had blong kasem mani long COVID-19 pandemic ia i stap gud bakeken.
