Monday, July 15, 2024
25.5 C
Port-Vila
Monday, July 15, 2024
More

    Ol anda 18 blong nomo ko long klab

    Kavman i blokem ol pikinini anda 18 yia blong no ko long klab.

    Deputi Praem Minista mo semtaem Minista blong Internal affairs, Alatoi Ishmael Kalsakau i talem se “Polisi pepa ia bai ol naet klab mo ol bar i mas putum ol rul blong ID, bifo wan man i ko insaed long wan naet klab.

    “Mo no alawem ol yangfala blong tekem alcohol.”

    Hemi talem se signing blong polisi pepa ia i sud hapen long tete aftenun.

    “Mo ol owna blong ol naet klab o bar nao bae oli regulatem hem ia mo mekem sua se yumi katem aot namba blong ol yangfala ia, we age blong olketa i no stret blong entarem wan naet klab o bar,” hemi talem.

    Deputi Praem Minista Kalsakau i talem se polisi pepa ia i folem nomo ol arem nogud we ol pipol i stap raisem ap, we i lukim naoia fulap yang pipol inkludum ol studen i stap ko long klab.

    VBTC i kasem toksave se long paragraph wan, chapter 17 blong Liquor licensing Act (CAP 52 blong 1969) i statem i clia se eni person we i anda long 18 yia bai i no mas tekem alcohol, sapos hemi tekem, ten hemi komitim wan ofens we i save faen long wan amaon blong VT10,000.

    Mo eni man we i salem or saplaem alcohol long ol pipol we i anda long 18 yia, bai i save faen long wan amaon blong VT25,000, or bai i save ko long kalapus blong tri manis.

    VBTC i toktok long sam pipol long social media mo plante oli talem se oli agri long aksen we kavman bae i tekem blong stopem ol yangfala anda 18 blong no mas ko long klab.

    Niro Kapalu, i talem se “Long lukluk blong mi, sapos kavman i wantem loa ia i wok, oli mas mekem ol loa ia i moa strong blong mekem se ol securiti i strik long ol gate blong ol naet klab.

    “Sapos wan man i wantem ko long klab hemi mas soem ID card blong hem bifo hemi ko insaed,” hemi talem.

    Wan nara lokol i talem se “Everi klab i sud mekem wan rul blong ol kastoma i soem ol ID card oltaem.”

    Wan Seasonal Workers Program (SWP) wokman long Australia i talem se “Plante ded i stap hapen long kaontri from isu blong alcohol mo hemi gud kavman i tekem stand blong stopem.”

    Wan yang mama i talem se “Plante yangfala ia we oli stap ko long klab, oli stap stadi yet long skul mo i influencem olketa long plante rabis wei.

    “Taem oli ko long klab, ol nara isu i happen olsem ol gel oli kat bel mo even oli tekem ol drugs we oli stap skul yet,” hemi talem.

    “So hemi taem i stop.”

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen