Kavman i no provaedem sabsidi fund blong help adresem hae cost blong fuel long kaontri.
Vanuatu i experiensem inkris blong fuel praes long las tu manis mo pipol i kwestenem kavman.
Minista blong Finance mo Economic Management, Johnny Koanapo i talem se kavman i bajet blong ol emejensi operesen blong hem from situesen ia bambae i no stap longtaem.
“Long taem naoia i kat namba blong ol samting we mi mas tekem into akaon; feswan yumi mas lukluk long capasiti blong yumi,” Minista Koanapo i talem.
“Naoia budget we mifala i putum naoia espeseli long supplementary hemi mak blong dil wetem ol emergency mo operation blong kavman. Be semtaem emergency funding we mi tabolem ripot blong hem hemi mak blong stimulus mo inkris praes blong fuel hemi wan samting we i jes set in long kaontri mo ol nara pat long Wol.
Minista Koanapo i talem se kavman i sapotem wan niu projek blong fuel depot we bae i provaedem jip praes.
“Ating wan long ol moa sastainable solusen we kavman hemi wok in patnasip wetem Vanuatu National Provident Fund naoia hemi blong yumi saenem wan niu fuel depot we mi biliv se olsem Minista risponsibol blong helpem yumi daonem praes blong fuel blong mekem se ol bisnis tu yumi save avoidem ol cost blong yumi,” Minista Koanapo i talem.
