Wan niu historikal saet i helpum ol pipol i rememberem wan bigfala disasta long Dip Point long West Ambrym.
Long Tusdei namba 28 September hemi wan dei we pipol long Dip-Point i tingbaot ol victim blong volcano erapsen long elan ia.
Long yia ia Vanuatu Tourism Office hemi kam ap wetem tingting blong mekem wan exhibisen i ko long Dip-Point, West Ambrym long dei ia.
Visit ia hemi blong mekem Lonwolwol long Dip-Point i kam wan tourist destination mo wan historikal saet long kantri.
Long namba 6 Decemba 1913, volcano hemi faerap mo destroem vilij blong Lonwolwol, we i takem plante life, plante pipol i lusum hom blong olgeta, plante pipol i muv aot long elan, mo destroem fes eva hospital blong New Hebrides.
Pipol blong Dip Point i neva forgetem day ia evri yia mo oltaem oli kam togeta blong rememberem bigfala disasta ia.
Wan pepes blong markem dei ia hemi blong ol pipol long community i save buildem back olgeta wan wan long taem blong disasta ia.
Tourism ofis wetem ol partner blong hem i organisem wan exhibition, we oli sigaotem “Dip Point Volcano Eruption Exhibition” emia hemi tru long sapot blong project Development Officer blong Malampa Tourism wetem Manager blong Malampa Tourism Center.
Tourism operata mo semtaem Chairman blong West Ambrym Sub Turism Asosiesen, Mr Jessy Temar, i talem se bigfala tingting behaen exhibisen ia hemi blong pipol i mas save se ples ia hemi wan historikal saet.
“Tingting we mifala wantem mekem exhibisen ia from, hemi the first mission hospital, we volcano erapsen hemi bin destroyem long 1913.
“So tingting ia nao i mekem se mifala wantem mekem exhibition ia from fulap long ol generesen naoia oli no rili save tumas about histori blong ples ia, we hemi wan historikal saet ia, we mission nao hemi developem fastaem.”
Wan narafala tingting we Mr Temar i talem hemi blong exhibisen ia i helpem plante young genereren blong oli save histori mo resen from wanem disasta ia i happen long saed blong kastom.
“Long Decemba 6, wan volcano erapsen we hemi wan man-made disasta, we pipol nomo emi bin plan blong damagem ples ia, we oli usem volcanoe blong destroyem ples ia. Emia from sam difference nomo we bin stap bitwin olgeta long kastom wetem church. So big tingting ia nao mekem se oli mekem plan blong destroyem ples ia,” hemi talem.
“So hemia nao mifala i wantem mekem exhibisen ia blong tokbout blong pipol i save se i tru i bin kat wan mission hospital long ples ia mo oli mas save se wanem nao i bin spolem ples ia mo wanem nao resen we i mekem se ol pipol long taem ia i tingting blong destroyem ples ia.”
Fulap generation naoia oli no save history blong ples ia mo ples we mission nao hemi developem fastaem.
Wetem initiative ia long saed blong turism, igat hop se bae plante long olgeta pikinini naoia isave lanem mo apreciatem wokabaot blong olgeta pipol blong Dip Point.
