Department blong Labour i talem se tri jata flaet blong tekem ol wokman i ko wok long Australia bifo en blong yia i stap long proses.

Commissioner blong Labour, Murielle Metsan Meltenoven, i talem se hemia i folem hae demand blong ol fama long Australia from oli nidim ol pipol blong wok long fam.

Hemi talem se naoia oli stap wok wetem ol agen blong save ricruitum sam moa seasonal wokman blong pat long Seasonal Workers program long Australia.

“ Bae i kat sam grup blong ol wokman ia i ko long West Australia mo nara grup i ko long Queensland,” Mrs Meltenoven i talem.

“ Yumi lukim se long taem blong COVID-19 pandemic ia, demand blong wok long Australia i hae we i minim se ol fama mo employee blong Australia oli nidim ol skil mo save blong ol Ni-Vanuatu wokman mo hemia nao bae oli mas ko wok.

“ Hemia hemi wan opotuniti tu long ol wokman blong kaontri  blong ko wok from mani blong helpem famili blong olketa mo semtaem  mekem mani i kambak long kaontri.”

Wan lokol we i stap pat long Seasonal Workers Program blong ova tu yia i talem se long manis blong November ia bae oli stap ko long Australia blong wok long tomato fam.

Wokman ia oli sud travel i kobak vinis long eli yia ia mbe i no bin posibol folem COVID -19 kes long Australia.

Commissioner Meltenoven i talem se travel blong ol wokman ia hemi proriti naoia folem COVID-19 pandemic.

“ Sefti mo health blong wokman i stap yet olsem priority blong Kavman blong Vanuatu mo ol fama blong Australia,” hemi talem.

Labour Department i hop blong sendem 486 wokman i ko long tri jata flaet ia.

I gat tu jata flaet finis we i bin tekem 324 wokman i go daon long Northern Territory blong Australia blong pat long Mango Pilot projek.