Australian Minista blong International Development mo Pacific i visitim National Broadcasting Haos; Vanuatu Broadcasting mo Television Corporation(VBTC) blong fes taem long wik ia.
Honoroble Pat Conroy i kat wan interview blong tokbaot ol plan blong Australia mo Vanuatu long fuija mo semtaem talem tankiu long ol staff blong VBTC blong ko hed infomem pipol wetem infomesen.
“Mi travel raon long Pacific olsem pat blong wok blong mi mo bae mi mas talem se VBTC hemi wan professional organization we mi dil wetem mo mi wantem talem tank yu long dedikesen blong provaedem infomesen long taem olsem we netwok i aot mbe infomesen i stil ko aot long ol Ni-Vanuatu,” Minista Conroy i talemaot.
“Hemi wan priviledge blong stap long plesia long heart blong Vanuatu vibrant media sekta. Mo mi no talem toktok ia from mi kam long plesia mbe mi jes kamaot long wan interview we ol tuff kwesten oli bin askem long mi so hemi soem saen blong professionalism.
“Wan fri independent media hemi impoten blong wan independent pacific mo hemia nao i serem ol vois blong pacific region mo hemia nao i talemaot ol semak jalenj olsem climate change mo ol nara cultural aktiviti olsem sports. Australian kavman i introdusum wan plan blong sapotem content, expandem transmisen mo inkrisim capasiti blong ol patna. So pat long hem ia Australian Broadcasting Corporation(ABC) i mas yusum ol mani ia blong help trenem moa pacific media pipol mo semtaem produsum moa content blong pacific.”
Chief Executive Ofisa blong Vanuatu Broadcasting mo Television Corporation, Francis Herman i talem tankiu long kontinu help we Australian Kavman i stap givim blong sapotem VBTC long reform program blong hem.
VBTC i handem ova wan gift i ko long Minista Conroy olsem tok tankiu.
Hemi nambatri visit blong Minista Conroy i kam long Vanuatu.
