Vanuatu hemi mas kat ol smart tinktink blong yusum ol roten ship blong mekem mani mo givhan long economi.

Lokol Artist, Arno Robert i wantem luk kavman i tekem ap tinktink ia blong save gohed yusum ol ship ia mo no draonem long solwota afta fogetem.

Mr Robert hemi resemap wan konsen abaot environment we i lukim solwota blong Vanuatu i kam wan ples blong draonem ol olfala iron long hem.

“Tete yumi stap luk ovasi i kat ol floating restaurant; Ol floating restaurant we oli float long ol ded sea stret long ol haba blong ol citi mbe why not yumi ol man Vanuatu i kat wan floating restaurant.” Mr Robert i talem.

“Seken wan hemi bio gas. tete fulap pipol i wantem mbe sapos yu lukluk gud hemi wan isi samting blong mekem. Hemi no nidim wan bigfala material. Hemi no nidim moa cost. Hemi wan samting we long tu-tri wik taem yu laetem faea. Taem yumi waste yumi stap komplen i ko ovasi se no from yufala i produsum ol industrial factori blong mekem se hemi damejem mifala ol eria long pasific mbe no yumi, yumi mas soem.”

Long Wednesday wik we i pas, ol atoriti i draonem wan moa Ship Touraken 2 aotsaed long Port Vila.

“Ship ia mi nao mi klinim, mi aotem evri mazut mo kilim gud.” Peter Charlie, Crew Memba blong Ship Touraken 1 i talem.

“Oli no riperem ship mekem se hemi roten tumas,” Jack Maniki, Crew memba long ship touraken 1 i talemaot.

Long rispon, Harbour Master long Ports and Harbour, John Nasak i mekem i klia se hemi wan rikwamen blong owna blong wan ship blong mas tekem aot ol oil mo mazut long ship bifo oli save draonem.

“Oltaem taem mifala i ko blong draonem ship, bae mifala i mekem sua se oil i nogat mo tu ol poison sabstens we i stap long ol exhaust blong ol ship ia bae i nosave ko long solwora blong i ko daon stap long seabed,”

“Ol ples we yumi ko stap dropem ol ship lem ia, deepest depth hemi 900 mita ia.

“Hemi wan gudfala ples blong statem environmen blong fish long ol ship ia mo man i save mekem tu olsem wan turis atraksen olsem fishing site blong save dive. Ol kaen tinktink olsem ia yumi long komuniti tu i save kamap wetem mbe mifala long Port and Harbour i blong tekem aot nomo insaed long tufala laet ia long Port Vila haba.

Director blong Fisheries, Sompert Gereva i talem se hemi wan tinktink we i nidim plante research mo diskasen long hem bifo save wok long hem olsem wan fishing atraksen.

“Yumi save se taem wan ship i draon long solwota bae hemi kam man -made reef we plante marine animol oli liv long hem,” Mr Gereva i talemaot.

“Mbe i mas kat plante stadi blong yumi save wok wetem.”