Wan victim blong alleged polis brutaliti long Santo hem i bin tokaot long wik ia abaot vaelens we hem i talem se hem i bin ko tru long hem.
Maria Jerry wan long ol mama long Valui Steisen long Big Bay Bush i talem se wan long ol Luganville Polis Ofisa ia i bin allegedly kikim hem mo wipim hem wetem baton (nalnal).
“Long Fraedei 19 June taem mi stap long haos blong mi mo stap sikrasem kokonas blong melekem kakae blong ol pikinini blong mi blong ko long scul. Polis ia i kam insaed i askem mi, mi se no mi no save wan samting. Taem mi talem olsem, hem i karem dis kokonas mo kapsaetem long hed blong mi,” hem i talem.
“Afta i banghem dis long hed blong mi. Hem i askem ol boi mbe mi se mi no save olgeta. Semtaem hem i slapem mi. Taem mi kamaotside, hem i kikim mi long shus mo wipim mi long matrak.”
Ms Jerry i talem se hem i witnisim fo polis ofisa i allegedly bonem daon haos blong hem wetem tri narafala haos.
“Taem oli ko antap long Mataloi mo asoltem pasta ia vinis, oli kam daon nao oli bonem ol aos. Mi mi stanap mi luk olgeta,” hem i talem.
“I gat fo haos, oli laetem majes oli putum long ol natangura haos ia. Afta oli shud long masket. Mi mi stanap mi luk oli shud long masket, oli shud i ko long ol haos we i bon ia. Taem faea i stap bonem haos, oli kam stanap long trak mo stap mekem laf.”
Hem i talem se oli allegedly karemaot ol rus kava we hem i draem blong salem blong pem scul fee blong kel blong hem mo putum ko long trak.
Ms Jerry i gat eight pikinini mo hem i gurdian tu blong narafala fo pikinini we oli stap wetem hem mo ko long scul.
Hem i talem se afta we ol polis i allegedly bonem daon haos blong hem. Hem i karem ol pikinini blong hem mo ko long Mataloi blong silip long haos blong wan famili blong hem.
Las bon pikinini blong Ms Jerry hem i gat faev yia.
“Everiwan oil stap attendem scul yet, everi buk, pen mo unifom blong olgeta i bon everiwan. Naoia oli stap nomo, oli no mo ko long scul,” Ms Jerry i talem.
Hem i talem se hem i bin traem blong putum wan ripot long Luganville Polis Station mbe oli nosave kivm janis long hem blong putum ripot.
Ms Jerry i stap naoia long Luganville Baptis Church wetem ol pikinini blong hem mo araon 49 narafala pipol long Big Bay Bush we haos blong olgeta tu i bon everiwan.
Luganville Baptist Church i kivim shelda long olgeta mo kakae.
Sanma Police Patrol i konfemem se investigation blong alleged polis brutaliti o violens i stap kohed finis.
Alleged polis brutaliti kes ia i hapen long las Fraedei we i lukim plante haos i bon mo damej long propeti blong samfala pipol long Big Bay Bush.
Palamen hem i bin amendem long las wik Polis Akt blong mekem se olgeta polis ofisa we i komitim asolt taem oli stap long duti, bae oli save finis long wok blong olgeta mo long fos.
Ministry blong Education i talem se bai hemi assistim ol pikinini we oli bin affected long insiden long Big Bay Bush long Santo.
Daerekta General blong Education mo Trening, Bergmans Iati, i talem se long kaen situation olsem we ol pikinini oli inosent mo oli no save wanem i happen, mekem se oli kam viktim long isiu blong wan komuniti, bai education ofis bai i help blong provaedem ol risos blong lening blong olgeta we i bin damej.
