Palamen i pasem bill blong Vanuatu National Provident Fund (Amendment) Act No of 2020 wetem 51 votes long wik ia.
Minista blong Finance mo Economic Management, Johnny Koanapo, i presentem bill blong Vanuatu National Provident Fund mo talem se tinktink blong karem bill ia i ko long Palamen hemi blong ol memba oli stat aksesem ol benefit blong olgeta taem oli kat 47 yia, mo i gat ol jens we hemi gaedem wok blong bod blong fand ia.
Hemi talem se, “Total mani blong ol memba we oli stap pem i ko long Vanuatu National Provident Fund i kasem VT 22.7 billion.”
“I bin kat araon VT 2.1 million we fand i kivim aot long ol memba blong hem blong oli yusum, hemi ol entitlemen blong olgeta,” Minista Koanapo i talem.
“Tete loa hemi kam blong yumi legislatem ol samting we i no bin legislate bifo long pas, yumi enhancem regulatory framwok blong mekem se expentija bambae oli mas legislate blong mekem se ol memba oli kat konfiden se loa hemi kat duti blong lukaotem gud ol investmen blong olgeta.
“Kavman bae hemi mekem sua se Provident fund bae i kontinu blong lukaotem gud ol mani blong ol pipol mo mekem sua se oli investem long gudfala wei blong mekem se interest hemi ko bak long ol memba.”
Minista Koanapo i talem se, “Mani ia i soem se Vanuatu i stap long wan helti status.”
Hemi talem se jens long bill blong Vanuatu National Provident Fund i alaoem tu olgeta we oli kat own bisnis blong yu, ol fama mo ol seasonal wokman we oli pat long labour mobility program oli save mekem saving blong olgeta insaed long fund.
“Kontribusen blong olgeta bae hemi base long hamas oli wantem putum long saving akaon,” Minista Koanapo i talem.
“Hemia i wan niufala jens we yumi mekem mo i olsem ol wokman we oli wok long wan kampani, everi pay dei, oli dedaktem 4 percen aot long salary blong olgeta mbe ol olgeta pipol long infomal sekt olsem ol fama, ol seasonal wokman mo olketa we oli kat own bisnis blong olketa oli save putum eni amaon blong mani we oli wantem putum.”
Long debate blong bill, Opposition block i bin sapotem kavman blong pasem bill ia.
Bill blong Vanuatu National Provident Fund hemi stap olsem fes bill we Palamen i bin toktok raon long hem long seken ordinary sitting blong hem.
Fes age blong ol memba blong Vanuatu National Provident Fund i aksesem ol mani blong hemi long 55 yia.
