Kot bambae i mekem disisen long vakansi blong seat blong Mr Bruno Leingkone long Mande bifo Palemen i sidaon.
Suprim Kot long Fraede i harem se Mr Leingkone i no bin stap insaed long Palemen long 6 defren deit bitwin manis blong Okis kasem Septemba.
Mo deit we i lid iko long vakansi blong Mr Leingkone i namba 17 Okis we hemi namba tri siting we hemi absent mo nokat eni pemisen blong Spika.
Kot i harem se i no gat evidens se Spika Simeon Seoule i givim Mr Leingkone pemisen blong no atendem olgeta siting ia.
Lawya blong Spika, Garry Blake, hemi talem long kot se acording long law ol MPs oli mas kasem wan pemisen long Spika blong Palemen blong oli save absen long siting.
Mr Leingkone i talem long kot se sekreteri blong hem i bin raetem wan leta abaot rison blong absens blong hem mo leta i bin ko kasem Spika.
Be Mr Leingkone i talem se i kat wan nomol practis long gavman MPs se oli infomem Spika long absens blong olgeta sipos oli sik mo oli bilif se Spika hemi risivim no mata se i nogat rispons long hem.
Long agumen blong Spika Simeon Seoule hemi talem se hemi neva risivim leta we Mr Leingkone i kleim se sekreteri blong hem i bin deliverem iko long hem.
Mo hemia hemi bifo Mr Leingkone i livim kauntri blong ko long Korea blong medikol tritmen.
Mr Seoule i talem se hemi no kivim eni pemisen long Mr Leingkone blong no atendem palemen taem i kat siting.
Lawya blong Mr Leingkone, Justin Ngwele, i argue long kot se Mr Leingkone ino bin absen long 3 konsecutif siting from hemi ol defren sesen.
Mr Ngwele i argue tu se Spika i shud act moa blong faenem aot abaot absens blong Mr Leingkone.
Mo tingting we Mr Leingkone i talem se hemi no risivim eni rispon long Spika folem leta blong hem mo i tekem se hemi kat pemisen long Spika hemi stret nomo.
Long Mandei 25 blong Septemba Spika i anaonsem se sit blong Mr Leingkone i vacant folem absens blong hem long 3 konsecutif siting blong Palemen.
Long yestede, Suprim Kot hemi no akseptem rekwest blong Mr Leingkone blong wan stay oda aikensem wanem Spika hemi mekem long Mandei.
Long Fraede, Mr Leingkone hemi atendem kot long ofisel trak olsem wan Minista.
