Suprim Kot i no akseptem stay oda rekwes blong Presiden blong National United Pati, Bruno Leingkone.
Kot i bin anaonsem disisen tedei long moning afta wan hearing yestedei.
Desisen blong Spika long Mandei long Palemen blong aotem Mr Leingkone olsem memba blong Palemen i stap yet.
Tumoro kot bae i harem wan petisen we Mr Leingkone I putum, blong jalensem legaliti blong desisen blong Spika.
Mr Leingkone hemi bin wan Memba blong Ambrym mo Minista blong Yut mo Spot.
Hemi lusum seat blong hem long Palemen folem wan oda we Spika i mekem long Mandei from we hemi no gat pemisen blong no atendem 3 konsecutif siting blong Palemen.
Long Wednesdei, Mr Leingkone i bin rekwestem stay oda blong holem bak oda we Spika i mekem.
Long desisen blong hem, Justis Bill Hastings i talem se seksen 2(d) blong Memba blong Palemen (Vakasion long seat) akt i “mandatori” from akt i talem se memba blong Palemen “shall” lusum seat blong hem sapos hemi no atendem 3 konsecutif siting blong Palemen witaot pemisen blong Spika.
Jaj i talem se sapos hemi mekem stay oda ia, Mr Leingkone i stil save stap olsem wan memba blong palemen mo stil save sevem konstuensi blong hem, be i gat janis blong brij long law.
Hemi talem se desisen blong Spiki i no mekem vakansi ia, be law i bin mekem vakansi.
Justis Hastings i talem se sapos hemi no mekem stay oda ia, desisen blong Spika se seat hemi vakant folem seksen 2(d) i stil stap. Hemi talem se from hearing blong petision blong Mr Leingkone bae emi hapen long Fraedei, stay oda ia ino gat wan bigfala afekt long Mr Leingkone.
Jaj i talem se hemi luk olsem weit blong evdens we lawya blong Mr Leingkone, Justin Ngwele, hemi givim mo evdens we lawya blong spika Garry Blake hemi mekem, i lay moa iko long desisen blong no givim stay oda.
Hemi mekem desisen se rekwes blong stay oda blong Mr Leingkone i no go tru. Hemia i minim se Mr Leingkone i no longa wan memba blong palamen stat Mandei ikam.
Hearing blong petisen we Mr Leingkone i jalensem oda blong Spika bae i stap tekem ples long Suprim Kot long Fraedea namba 29 Septemba long 9am.
