Turism sekta hemi kontribute bigwan long Gross Domestic Product blong kaontri afta long 40 yia.
Turism 40 hemi slogan blong komemoratem ol ajivmen we turisim hemi stap kontribut long hem ova long 40 yia afta long independens blong kaontri.
Long Tourism 40 photo exhibition we i hapen long las wik blong selebretem kontribusen blong turism long 40 yia independens blong Vanuatu, Chief Executive Officer blong Vanuatu Tourism Office, Adela Aru, i talem se, turisim sekta i bin kontribut long VT19.5 billion long ekonomi blong Vanuatu mo long las yia turism hem i kontribut long 30 pesen long Gross Domestic Product blong Vanuatu.
Hem i kontinue blong talem se jalens blong COVID-19 hemi no shud stopem selebresen blong ol benefit we turism hemi stap provaedem long Vanuatu long pas 40 yia.
Long photo exhibition ia, sam turism opereta long kaontri i bin serem ol sakses stori blong olgeta ova long 40 yia period ia.
Marian Numake, ona blong Evergreen Resort, hem storian long hao risot blong hem i bin develop kasem yia ia we kaontri i stap selebratem 40 yia blong hem.
Ms Numake i talem se hem i stat blong tekpat long turism bisnis long kaontri long taem blong graon breking blong Tanna epot i kam intanasanal epot.
Hem i talem se hemi lukim olsem wan doa blong opojuniti blong pat long turism mo afta long hem ia, hem i mekem graon breking blong risot blong hem we hem i Tanna Evergreen Resort.
Ms Numake i talem se nomata long ol sakses stori ia be i gat plante jalens we i bin aftektem bisnis blong hem olsem, impak blong Saeklon Uma, Pam mo COVID-19.
Hem i talem se mbe jalens blong operetem wan bisnis i save lid i go long sakses.
Tourism 40 photo exhibition hemi selebratem tu ol had wok blong ol pas lida we oli tek pat long turism indastri ova long 40 yia blong independens blong Vanuatu.
