Luganville Memba blong Palemen i kol blong kavman i klia long niu curfew from i afektem pipol.

Long Friday leit aftanun, Health Minista i anaonsem niu curfew blong 6pm kasem 6am blong wan manis long Torba, Sanma, Pentecost, Erromango, Tanna mo Aneityum.

Honoroble Matai Seremaiah i talem se health i mas luksave impotens blong komunikesen.

“Yestete(Friday April 29) yumi save se hemi wan kavman pei dei mo plante long ol mama blong Luganville oli bin priperem kakae blong olgeta wetem tinktink se curfew hemi long 8pm,” Mr Seremaiah i talem.

“Mo kwik taem nomo long aftanun anaonsmen i kamaot blong talem se curfew hemi kobak long 6pm mo hemi kosem bigfala problem from ol mama ia oli mas rash i kobak long haos wetem ol kakae we oli nomo salem.

“Sapos kavman hemi disaed blong muvum bak curfew at least oli letem wan dei in advans blong pipol i save se tumoro bae kat jens curfew blong oli save planem laef blong olgeta. Mo taem oli jes kamaot we yumi sek nomo, hemi no festaem we olsem from i hapen plante taem vinis long pas.”

Mr Seremaiah i kwestenem feaness long ol disisen.

Hemi talem se oli expektem blong curfew i ko daon.

“Long las wik taem yumi stap luk apdeit blong ol COVID kes, wetem long wik ia i soem se long las 24 haoa, Port Vila mo Sanma kolosap tufala i sem fika nomo,” Mr Seremaiah i talem.

“Olsem MP blong Luganville mi wantem kavman i kamaot blong talem se from wanem nao Port Vila hemi difren long Sanma? Port Vila naoia i kobak long level 2, Sanma i stil stap long level 3, curfew haoa hemi inkris i kambak long 6pm-6am so ol pipol long Sanma i nidim wan ansa long hem ia.

“Fulap famili oli mekem mani tru long sale blong kakae o kava. Mo fulap bisnis oli traem blong adapt long ol work haoa blong mekem ol shift mo taem yu ridusum curfew haoa i minim se yu katem daon taem blong wok mo hemia i putum less(smol) mani long poket blong ol wokman”

Long rispon, Health i askem pipol blong folem curfew mo bae oli lukluk bak long hem.