Sunae komuniti long Moso aelan i planem wan komuniti garen olsem wan rispon aktiviti afta long Saeklon.
Community Disaster Climate Change Committee long Sunae, Abel Joel i talemaot long VBTC Nius tete se plan hemi blong rijistarem olsem wan food basket mo saplae kakae i ko long ol nara fama.
“Afta long Saeklon, kominiti i kat wan miting mo mifala i kamap wetem wan tinktink blong kat wan rispon aktiviti blong mekem wan komiti garen blong 1 hekta mo divaedem long fo plot; Target hemi blong planem kumala, manioc, taro wetem ol vegetables,” Mr Joel i talem.
“Taem ol kakae i redi blong harvest, bae mifala i rijistarem olsem wan food basket blong sharem ol cuttings mo vegetables i ko long ol nara fama o famili we oli nidim. Tete mi kam kolektem sam fri hand blong kumala, manioc, taro mo yam we ol fama blong Eton i salem long store haos blong agriculture. Mi bin mekem fes raon vinis afta long saeklon.”
Mr Joel we hemi stap olsem Area Administa blong Not West Efate we i lukaotem ol komuniti stat long Mangaliliu i ko kasem Malafao mo tufala aelan blong Lelepa mo Moso i askem strong blong ol lokol i planem bak kakae long garen mo no wet.
“Yumi planem ol crop we hemi blong 3-6 manis; kavman i help long fes push blong kakae mbe yu kakae rice mbe yu planem bak garen blong yu,” Mr Joel i talem.
“Yu plant blong rere taem disasta i kam mbe yu kat kakae. Olgeta we wota i fulap long garen i gud blong plant long ples we i nogat wota mo tu redi long dry sisen we i stap kam.”
Mr Joel i askem ol lokol blong kamaot wetem ol creative tinktink.
