Vanuatu Society blong ol Pipol wetem Disability i call long kavman blong setemap ol evacuation senta we ol pipol wetem spesel nid i save aksesem long taem blong disasta.
Community Base Inclusion Development Officer long Vanuatu Society blong ol pipol wetem Disability, Sheila Anga, i mekem kol ia.
“Kavman sapos i save setemap ol evacuation senta we hem i aksesebol long ol pipol wetem disability,” Ms Anga i talem.
Ms Anga we i stap lidim wan tim blong Vanuatu Society blong ol Pipol wetem Disability we oli stap long South Pentecost naoia, i talem se aksesebol bilding hem i wan big jalens blong ol pipol wetem spesel nid long eria ia.
“Mi sad blong arem se long sam ples long taem blong hurricane, sam haos i foldaon antap long sam pipol wetem disability. Mo sam pipol wetem disability oli staon aotside long open air truaot long saeklon kasem taem saeklon i vinis.”
Philemon Tamtam, Chief blong Ramputor Village long South Pentecost, we hem i wan man wetem spesel nid, i apil long Kavman blong bildim wan evacuation center kolosap long eria blong hem.
“Mi wantem apil long Kavman sapos i gat wan evacuation senta we I save stap long ples ia we i save helpem mifala long taem blong wan disasta,” Chief Tamtam i talem.
Hem i talem se long taem blong Saeklon Harold, oli bin faenem i had lelebet blong muv i ko long evacuation senta from win i bloa strong tumas mo evacuation senta i stap longwe.
Ms Anga i talem se ol evacuation senta i sud stap long wan ples we ol disable pipol i save kasem.
Hem i talem se plante long ol vilij we oli bin ko long hem oli nogat evacuation senta.
“Yumi talem vinis se yumi inclusive, mbe hem i sad blong harem se moa long faev pipol wetem disability, sam oli mas stanap aotside long strong hurricane kasem long moning mo sam, haos i foldaon antap long olgeta,” Ms Anga i talem.
Hem i talem se hem ia i no wan gud storian from Vanuatu hem i diklerem vinis se hem i inclusive.
“Taem yu gat wan pesen wetem disability long wan komuniti, komuniti ia i mas be inclusive, blong mekem se pesen wetem disability hem fil se hem i pat blong komuniti ia.”
Tim blong Vanuatu Society blong ol pipol wetem Disability ia i stap kolektem ol infomesen blong ol pipol wetem spesel nid long South Pentecost, long ol eria we Cyclone Harold i afektem olgeta.
