Ol studen i stap putum presa long scholarship ofis blong tekem aot evri scholarship studen aot long Memba Education Support Scheme.
Oli kleim se oli bin givem opotuniti blong mekem disisen blong joinem scheme mo hemi no wan voluntary disisen.
Arem nogud ia i kam afta we Vanuatu Scholarship bod i disaed blong karemaot evri alaowens peimen blong ol scheme studen we oli karem Vanuatu kavman scholarship.
Wan studen ripresentativ long Fiji, Steven Kalo i steitem se ol Scholarship fom i neva mensenem scheme ia blong Vanuatu National Provident Fund.
“Mifala i aplae from wan VANGOV scholarship,” Mr Kalo i talemaot.
“Mifala i neva aplae from wan VNPF scheme program.
“From we mifala i nosave, National Scholarship mo training bod i alejli enta long wan Patnaship agrimen we Ombudsman i investiketem mo dikarem se hemi no folem loa.”
“Ol kaen dikaresen olsem scholarship bod mo VNPF bod i neva jalenjem long wan kot blong loa.
“I mekem se yumi biliv se disisen blong bod we hemi tekem blong karemaot ol alaowens peimen long ol scholarship studen hemi no raet direksen.”
Mr Kalo i talem se ol scholarship studen i agri from wan ful kavman scholarship be afta oli faenem se sam long olgeta i kasem funding long VNPF student loan scheme.
Scheme ia i pem ol airfare, akomodesen mo tuiten fi, plante vatu we ol studen ia i mas pem bak taem oli vinisim ol stadi blong olgeta.
Agrimen bitwin VNPF mo Education Ministry hemi blong kavman i pem studen alaowens.
Be i no longtaem i pas, Jeaman blong Vanuatu Scholarship i kamaot long national TV mo talem se long nekis manis kavman bae i nomo risponsibol long eni alaowens blong olgeta studen we i pat long scheme.
“Mi provaedem wan leta i ko long bod blong alaoem blong manis ia August bae hemi las alaowens we i ko long ol studen, be Scholarship Ofis mo Vanuatu National Provident Fund i nid blong wok tugeta blong alaoem wan smooth transition long nekis manis,” Collin Natonga i talem.
Disisen ia bae i karemaot kavman alaowens folem wan ripot we i kamaot i no longtaem long Ombudsman we i rivilim agrimen bitwin Vanuatu kavman mo VNPF long Member Education Support Scheme i no folem loa.
Long wan miting i no longtaem long Laukala campas long Fiji, ol studen i kol long ol memba blong scholarship bod blong lukluk serious long disisen ia from welfare blong olgeta i dipen long hem.
Long wan infomesen i no longtaem hae skul graduate i stap long ful kavman scholarship.
