Tijing Seves Comisen hemi rikrutum 91 tija finis mo namba ia bae hemi goantap olsem temporari mesas blong fulmap ol spes blong klosap 300 tija weh oli stap long saspensen naoia.
Hemia hemi folem wan mandate blong Tijing Seves weh hemi blong mekem sua seh edukesen seveses olsem wan esential seves hemi mas gohed.
Long wan interview wetem VTBC Nius tete aftenun Akting Jeman blong TSC, Hardison Tabi hemi confemem seh Comisen hemi saspendem klosap 300 Tija finis folem ol ripot weh hemi stap karem long ol skul.
Hemi eksplenem seh namba blong ol saspended tjia ia bae hemi save goantap folem ol ripot weh oli stap kasem.
Nomata long hemia Mr Tabi hemi comisen bae hemi kontinue blong ricrutim ol nara tija blong riplesem olgeta weh oli stap long saspensen.
Akting Jeman blong TSC hemi konfemem seh olgeta 91 tija bae oli stap long Gavman payrol from oli apruvum finis finacial visa blong olgeta folem arenjmen weh oli gat wetem Gaman.
Hemi seh oli saspendem ol Tija from oli stap long straek, oli no wok beh oli stap karem salari.
Mr Tabi hemi seh folem Act blong TSC bae hemi mas tekem aksem olsm suspensen fastaem blong save stopem salari.
Wan long ol bigfala skul long Port Vila, Ecole Anambrou, Akting Prinsipol Maccoe Yvette hemi konfemem seh olgeta too oli gat ol temporari tija ia weh TSC hemi rikrutum olgeta.
VBTC hemi visitim sam skul long Port Vila mo luk ol niufala tija weh Tijing Seves Commission hemi rikrutum olgeta.
Folem ol efot weh TSC mo ol skul administresen oli stap mekem sam skul oli stap wok from mo stap gobak long normol operasen finis.
Fres Wota Skul hemi wan long ol skul ia. VTBC Nius i toktok long Principol blon Joses Seth.
Mr Tabi hemi seh from Edukesen hemi esensel seves, oli stap mekem ol efort ia bae hemi lening blong ol pikinini hemi save gohed.
Hemi seh ol parents oli no sut wari mo sut sendem ol pikinini blong olgeta igo long skul. Hemi seh ol principals bong ol skul oli save hao blong save manejem.
Wan eksampol blong ol skul ia hemi Malapoa Collage weh oli sot long tija beh oli stap gat ol lecture blong mekem sua seh skul hemi gohed.
Evri prinsipol blong ol skul weh VBTC Nius i toktok wetem olgeta tete oli konfesmem seh afta long ol toktok weh i kamaot long Gavman, naoia namba blong ol studen weh oli stap go long skul i stap goantap bakegen.
