Kavman hemi askem ol kontrakta blong wok long ol pablik projek kwiktaem.

Minista blong Finance mo Economic Management hemi pointem aot se hemi wan wei blong givim wok long olgeta we i nogat wok.

Long wan spesel interview, Finance Minista, Honoroble Johnny Koanapo i talem se ova VT15 billion long ol projek ia.

“Yumi kat ol fida rod blong yumi we Public Works i putum aot ol kondrak be wok i no ko hed yet mo i mas. Mani hemi stap ko aot mo spendem blong rikruitum ol yang pipol long ol aelan.

“Budget blong Domestic airpot mo konstraksen blong yumi olsem exampol VT1.2 billion we yumi aloketem long Malekula we mi bin anaonsem,” Mr Koanapo i talem.

“2021 isu blong disput long graon mo i lid i ko long acquisition blong Norsup airpot. Mi askem kwiktaem long ministry blong lands blong spidim ap wok ia blong i save ko hed.  So yumi kat ova VT15 billion pablik projek inkludum Saot Santo, Tanna, Malekula mo Pentecost rod, Whitegrass airpot lighting, Smet i ko kasem long airport blong tar sealing (Port Vila), Finans, Head blong State mo Foreign Affairs bilding.

“Mi stap askem long ol kavman agensi we oli risponsibol blong ko daon mo wok. Yu karem kondrak yu ko hed. Olgeta we i nogat wok oli mas wok.”

Antoine Malsungai, Public Relation Ofisa blong Infrastructure mo Public Utilities ministry i talem se plan blong projek i ko hed.

“Tanna mo Malekula i stap long phase 3 we China Civil Engineering Construction Corporation i stap wok long hem,” Mr Malsungai i talem.

“Saot Santo wok i sud stat long Novemba yia ia. Ol design mo plan i stap ko hed yet.

“Olgeta projek we ol donor patna i fandem i on nomo.”

Mr Malsungai i talem se ol fo provins i kobak long alert level 1 so bae i help blong karemaot ol wok ia.

Hemi talem se Sanma provins nao i stap long alert level 3 yet wetem Shefa provins.

Minista Koanapo i kol tu long ol chinese kampani blong mas rikruitum ol lokol.

Mr Malsungai i talem se ol kampani ia oli folem advaes blong rikruitum ol lokol.