Kavman i talem se media mo ol user blong Fesbuk, i mas putum stret infomesen oltaem long pablik folem COVID-19 pandemic.
Fred Vurobaravu, Public Relations Ofisa blong Kavman, i talem se fasin blong putumaot rong infomesen abaut repatriation hemi no stret.
Hemi talem se infomesen long social media hemi andamaenem kondition blong State blong Emergency.
“I gat penalti blong breach blong kondisen blong State blong Emergency,” hemi talem.
“Ol media outlets oli mas jekem gud ol infomesen long ol stret othoriti olsem COVID-19 Advisory Committee , bifo oli putumaot long pablik.
“Ol negativ nius i save kriatem fraet mo wari long ol citizen blong kaontri we oli stil stap ova sea.”
COVID-19 Advisory Tim Committee i talem se oli nidim sapot blong ful komuniti, blong dil wetem nekis phase blong repatriation blong ol stranded Ni -Vanuatu ova sea.
Spokespersen blong COVID-19, Len Tarivonda, i talem se i kat plante rabis toktok i stap go raon abaot seken repatriation ia mbe plante long ol infomesen we i kamaot hemi no stret nomo.
Hemi talem se, ol pipol i mas wok tuketa blong pasem stret infomesen.
“Everi man i kat pat blong pleim blong sapotem wan wan pipol long had taem, we yumi stap long hem folem COVID-19 pandemic,” Mr Tarivonda i talem.
“Hemia i blong help katem down fraet, confusen mo fasin blong talem nogud narafala man.
“Kolosap 2500 pipol bae i kasem bak long Vanuatu long seken phase repatriation ia.”
Mr Tarivonda i talem se hemi impoten blong pipol, i kasem informesen nomo we i kamaot long stret atoriti.
“Yumi kontinu blong enkejem komuniti blong oli tekem stret infomesen especially ol infomesen we i kamaot long website blong Ministry blong Health mo National Disaster Management Office,” hemi talem.
“Mo yumi wantem olketa otoriti ia, blong mas rili mekem taem blong pasem aot ol infomesen ia, blong Vanuatu i pripea gud tuketa blong handelem ol kes blong COVID-19 sapos i kat long futja.”
