Kavman i stap diskas long wik ia long hao Vanuatu i save kat akses long medisin blong COVID-19 .
Spokespersen blong COVID-19, Russel Tamata, i talem se Ministry blong health hemi bin mit wetem everi multi mo bilaterol patna blong hem, ol Non -Gavman organsiation blong oli wok wetem helt long wan plan blong rolem aot program blong medisin ia long Vanuatu.
Hemi talem se plan ia hemi blong sapotem Kavman blong pem medisin blong COVID-19.
“ Blong Vanuatu i akses long stik meresin ia kwik taem, Vanuatu hemi stap insaed long wan grup blong ol kaontri we wan international organisation oli kolem GAVI i lukaotem blong help aksesem meresin ia taem bae i redi,” Mr Tamata i talem.
“International Organisation ia hemi askem kavman blong sabmitim sam long ol plan blong hem olsem requiremen blong save akses long COVID-19 medisin ia.
“ Yumi kat fulap deitline we bae yumi mitim olsem long Monday nekis wik, bambae yumi mas handem ova ol oda blong yumi stap ko.”
Spokespersen Mr Tamata i talem se “Mi hapi tumas we yumi kat ol United Nations organisation olsem UNICEF mo World Health Organisation we olketa nao oli stap behaed long ol immunisation program ia, from oli kat ol skill mo save blong asistem yumi long ol plan blong yumi ia.”
Hemi talem se ol diskasen ia hemi rili impoten long kaontri.
“Plan i expek blong vinis long nekis wik,” Mr Tamata i talem.
Mr Tamata i talem se sapos Vanuatu i kat COVID-19 medisin ia, 20 percen blong population blong Vanuatu bae oli stikim olketa fastaem.
” I kat ol man we oli wok long boda, mo olketa nao oli stap long risk bitim eni nara man mo tri percen nao bae i ko long olketa, ” hemi talem.
” Mo 17 percen bae i ko long olketa risk wan olsem ol pikinini mo olketa we oli kat sik blong Non Communicable Disease.
” Mi wantem asurem everi pipol ia se bae yumi everi wan i kat akses long medisin ia.”
I gat tri kampani long wol we oli stap long las steij redi blong putumaot COVID-19 medisin we oli produsum mo World Health Organisation nao bae i jusum wanem kaem medisin blong Vanuatu.