Ministry blong Agriculture i sapotem ol fama wetem rotavator machine blong help bilidim sekta blong Agriculture long kaontri.
Director General blong Ministry blong Agriculture, Moses Amos, i talem se hemi wan program we wan fama bae hemi pem 30 percen paymen blong rotovator machine mo Kavman bae hemi pem 70 percen.
Hemi talem se kost blong machine ia hemi samples ova VT 100,000.
“ Fasin blong mekem faming long bifo we yu ko klinim wan bigfala bush blong plant long hem mo planem fulap kakae insaed long karen ia, bae i mas stat blong kamaot long tinktink blong olketa pipol,” Mr Amos i talem.
“ Yumi mas stat blong kliarem ol bigfala eria blong graon nao mo hemia i minim se graon we yumi wok long hem, yumi mas mekem long wei se i kat inkris long prodaksen.
“ Mo hemia nao Department blong Agriculture i muv blong stat yusum ol machine we trakta i wan long olketa mo naoia yumi disaen blong ol fama i yusum ol rotovator machine.”
Long wik ia i gat ova long 20 fama oli pat long training we Department blong Agriculture i okanaesem blong lanem ol fama long hao blong yusum ol machine.
Ripot i talem se sam long ol fama ia oli pem vinis ol rotovator machine blong wok long hem long fam blong olgeta.
Hemi fes treining long Port Vila wetem ol fama mo Department blong Agriculture i stap plan blong go aot long ol aelan long kaontri blong mekem moa trening wetem ol nara fama.