Malvatumauri Kaonsel blong Jifs i elektem wan niufala presiden.

Jif Paul Robert Ravun bae i lidim kaunsel kasem 2028.

Seremoni blong handem ova ofis iko long hem i hapen long Monday aftenun afta long eleksen blong hem long moning.

Folem ol delay we i bin kam from Tropikol Saeklon Lola, Jif Ravun bae i tes tekem ova position ia long Jif Willie Grey Plasua folem end blong term blong hem olsem presiden.

Afta long eleksen risalt, Jif Ravun i talem tankiu long ol Jif we i putum wok ia long hem.

“Mi wantem talem tankyu blong trast mo konfidens we yufala i givim, bae mi luk fowod wetem this kaunsel blong mi lidim wetem resolusen we kaunsel bae karem blong kam tugeta blong yumi save ajivim ol gols mo dreams we yumi wantem.”

Jif Ravun hemi wan paramount jif blong Malekula.

Hemi bin wok olsem wan legol woka, mo hemi bin kam wan kaonela long wan lokol atoriti mo naoia hemi wan Paramaon jif, we i stap lukaotem 12 clan.

Taem hemi handem ova position ia, Foma president, Jif Willie Grey Plasua i talem se position blong lidasip long Malvatumauri bae always stap no mata wanem i hapen.

“Ol jifs oli kam oli ko, be wok blong protectem, promotem mo presevem kastom mo kalja blong Vanuatu bambae neva jens,” hemi talem.

Mo Jif Ravun i bin talem se wetem ol difdifren samting we i happen long kantri, bae kastom bambae stap semak oltaem.

“Gavanans blong kastom hemi totoli difren, hemi unique long wol, yumi nogat opposisen, i tru i gat sam dispute, sam agumen, be end blong dei, bae yumi nogat kaen fasin blong palemen.”

Naoia i stap bae niufala presiden blong Malvatumauri bae i gat fulap wok blong i complitim kasem taem we term blong hem i finis long 2028.

Wan long olgeta hem i blong finis ribildim Chiefs Nakamal we faea ibin bonen erli long yia ia.