Polis long Luganville i talem se i gat misunderstanding long media ova long allegation se polis long Luganville i kilim nogud wan pastor blong Mataloi long Big Bay Bush, Santo long wan ares long Friday.
Commander Chief Inspector, Rexton Langon long Sanma Patrol i talem se “mi no save konfemem long yu hao pastor hem i kasem kil be investigation hem i kik off finis naoia we oli stap long custody.”
Hem i talem se court long Luganville i listim kes blong olgeta suspek ia vinis blong sidaon long tedei.
Hem i talem tu se ol polis ofisa we oli involve long ares bambae oli mas jastifaem ol aksen blong ol mbe i gat wan criminal kes investigation hem i go on naoia aot long allegation ia.
Mr Langon i talem se ol polis i bin arestem trifala suspek, wan long olgeta ia nao hem i pastor ia, wan jif mo wan nara suspek.
Hem i talem se trifala suspek ia wetem araon 20 narafala pipol long komuniti blong Big Bay Bush oli allegedly bonem daon eight haos mo blokem rod akses blong ol victim from isu blong graon.
Mr Langon i talem se mo taem we ol polis i ko blong stabilisem situation mo putum pis mo oda, ol suspek ia i faet bak wetem spia, knife mo ston. So polis i yusum fos mo arestem trifala ia mbe ol narafala wan i ronwe.
“Isiu hem i kamaot long wan land dispute afta i lid i ko long ol suspek ia oli bonem daon araon eight haos mo oli blokem plante akses blong rod blong ol victim mo oli even muv i ko insaed long ol karen kava blong victim mo kilim ded ol animol blong olgeta tu,” hem i talem.
Mr Langon i talem se so i mekem se ol victim i gat fear oli ron we everiwan i kam long town mo polis i ko antap blong stabilisem situation.
Hem i talem se afta we polis i ko, naoia ol pipol long Big Bay Bush oli jas kat akses long ol karen mo ol ples we jif wetem ol grup blong hem oli bin blokem.
Long narafala storian, Pastor Abraham Akline, wan long ol suspek ia i talem se hem i bin save long wan faet we i brok aot bitwin ol yangfala blong wan vilij kolosap. Mbe hem i neva imaginim se bambae i kasem kil olsem.
Hem i talem se hem i sek we polis trak i spid kam long vilij blong hem long Mataloi. Trak ia i fulap nomo wetem ol polis ofisa long full unifom, baton mo shoes blong olgeta.
Hem i talem se trak ia hem i spid ko stret long haos blong hem. Mo bifo hem i toktok, wan polis ofisa i singaot se “hem ia long we, holem hem!”
Pastor ia i talem se hem i singaot mo talem nem blong hem mo talem se hem i wan pastor mbe wan polis ofisa i kam stret mo kikim hem stret long bel blong hem. Taem hem i stap long graon plante nara ofisa oli kam raonem hem mo stap kikim hem.
Hem i talem se taem hem i stap traem blong krae aot mo talem se hem i wan pastor wan ofisa i kilim hed blong hem long baton. Ol pikinini mo wife blong hem oli fraet mo stap krae. Mo ol polis ofis ia oli leftemap hem mo sakem hem long bak blong land cruiser.
Pastor Abraham i talem se ol ofisa ia oli ko insaed long haos blong hem mo karemaot ol personal item blong hem includum box mani blong hem.
Hem i talem se hem i witnisim we polis i stap ronem ol man mo laetem faea long ol haos. Oli mekem hem i kakae doti.
Hem i talem se wan long ol ofisa ia i holem grass mo pusum ko insaed long maot blong hem mo talem se “ya yu kakae posen man”.
Hem i talem se oli tretenem se bambae oli katem hem long chain saw sapos hem i no stop blong singaot.
Pastor Abraham i talem tu se hem i witnisim we ol polis i kilim wan narafala suspek mo fosem hem blong kakae nangalat.
Hem i talem se oli bin tekem hem i ko long hospital mo somap hed blong hem we i brok ia. Mo oli sakem hem long namba six.
Pastor ia i talem se long narafala dei, wan polis ofisa i kam mo talem long hem se hem i wan lucky man from nem blong hem i no bin stap long lis blong ares ia.
Hem i talem se afta long hemia hem i askem ofisa ia sapos i save karem bak ol ting blong hem we ol polis oli bin karemaot mbe oli talem long hem se mbae hem i kambak long Monday blong kolektem ol ting ia.
Pastor Abraham i talem se oli rilisim hem mo hem i kolem pastor blong Luganville Baptist Church blong save kam pikimap hem.
Commander Chief Inspector, Langon, i talem se polis brutality hem i wan pat we bae oli investigatem along the way.
“Bae ol ofisa blong yumi we oli tekpat long arres off course bae oli justifaem tru long statement blong ol long taem we bae i kam,” hem i talem.
