International boda blong Vanuatu bae i open long July.
Kavman i anaonsem long National TV tete.
Prime Minista blong Vanuatu, Honoroble Bob Loughman i askem ol bisnis haos olsem ol hotel mo resort blong pripea.
“Mi tekem taem ia blong enkarejem ol hotel mo olgeta lokol we oli onem ol bungalow blong stat mekem ol smol ripea blong mitim July 1st 2022 blong stat risivim ol turis,” Prime Minista Loughman i talem.
“Hemia blong helpem economi. ”
Jeaman blong Vanuatu Chamber blong Commerce mo Industry, Antoine Boudier, i talem se Private Sector i glad long nius.
Mr Boudier i talem se oli redi blong aplaem strik rul blong COVID.
Hemi talem se oli bin wet tu yia blong harem stret deit blong International boda i open.
“Long saed blong private sector, yumi reli glad mo mi wandem talem bigfala tank yu long kavman wetem anaonsemen we oli mekem folem miting blong council blong ol minista long Thursday,” Mr Boudier i talem.
“Private sector hemi stap luk fowod long wan zoom miting wetem minista blong Trade long ol dei i kam blong yumi save diskas moa long wei fowod bitwin private, industry mo Kavman blong mekem sua se economy blong yumi i live bakegen.”
Chief Executive Ofisa blong Vanuatu Tourism Ofis, Adela Isschar Aru i talem se plante long ol tourism industry oli gat plan finis.
Hemi talem se i kat fo steij proses blong wok lem naoia. Wan hemi Tourism Rediness, Market redi, Market open mo kriatem ol diman.
“Tourisim redines hemi blong save status blong evri tourism bisnis; wanem ol plan blong COVID, oli kat training, ol fasiliti blong olgeta i oraet mo sapos oli redi oli kat enaf mani blong opereit. Market redi; yumi nid blong mekem sua se Vanuatu mo ol trade patna ovasi oli mas pripea mo awea blong promotem mo salem Vanuatu.
“Yumi nid blong promotem tinktink blong Australia, New Zealand mo New Caledonia olsem ol fes tourism maket we bae yumi tagetem olgeta fastaem blong mekem se i kat dimand blong save kambak long Vanuatu.
“Maket open hemi blong kompete wetem ol regional patna ovasi from yumi stap kompete long wan smol maket shea. Yumi kat Fiji i openem boda long Decemba 1 2021, New Caledonia i mekem smol opening, Samoa mo Solomon Islands i stap putum plan blong open tu. So yumi mas kriatem campaign mo mekem moa awenes blong moa mani i kam.
“So wan hemi adventure seeker mo experience collectors hemi tu maket blong fokas, fokas long nature, environment, pipol, kastom mo kalja.”
“Yumi mas kriatem wan sastanabol dimand, las yia taem boda klos, yumi niu program agri, food mo eco tourism i kerap mo wok i blong kriatem maket diman.”
Hemi se i gat binis grant we kavman mo sam developmen patna oli save kam in blong help sapos ol binis oli nidim.
Vanuatu Chamber blong Commerce mo Industry i givim wan ripot long 2021 se ova 50 percent blong tourism bisnis i ko hed blong safa.
